Nur-Sultan turǵyny Ózbekstanmen shekarada gashıshpen ustaldy

SARYAǴASh. QazAqparat – Túrkistan oblysynda Ózbekstanmen shekarany ótý kezinde Nur-Sultan qalasynyń turǵyny gashıshpen ustaldy. Bul týraly oblystyń Polıtsııa departamentinen málim etti, dep habarlaıdy QazAqparat.

Saryaǵash aýdandyq polıtsııa bólimine «102» telefon nómiri arqyly «Jibek joly» shekara beketinde zańsyz esirtki tasymaldaý faktisi anyqtalǵany týraly habarlama túsken. Oqıǵa ornyna kelgen polıtseıler shekara pýnktinen ótý kezinde «Marıko» atty qyzmettik ıt Nur-Sultan turǵynyna qarata úrip, belgi bergenin anyqtaǵan.

«Jedel ýákilder kúdiktini tintý kezinde shalbarynyń oń jaq qaltasynan esirtki zatyna uqsas túıinshekti taýyp, tárkilegen. Tártip saqshylary ustalǵan er adamdy aýdandyq polıtsııa bólimine jetkizdi. Saraptamaǵa sáıkes, alynǵan esirtkitektes ósimdik zatynyń salmaǵy 2 gramǵa jýyq gashısh bolyp shyqty.

Qazirgi ýaqytta atalǵan jaıt boıynsha QR QK-niń 296-babymen «Esirtki, psıhotroptyq zattarmen, sol tektestermen ótkizý maqsatynsyz zańsyz jumys isteý» sotqa deıingi tergeý amaldary júrgizilýde. Tergeý oqıǵanyń barlyq mán-jaıyn anyqtaıdy», - delingen habarlamada.

Óz kezeginde Túrkistan oblysynyń polıtseıleri esirtki zattaryn zańsyz saqtaǵany, ótkizgeni, ósirgeni jáne kontrabandasy úshin qylmystyq jaýapkershilik qarastyrylǵanyn eskertedi.