Nur-Sultan polıtsııasy kúsheıtilgen jumys rejımine kóshedi

NUR-SULTAN. QazAqparat - 5 shildeden bastap elordalyq polıtsııa qyzmetkerleri kúshetilgen jumys rejımine kóshedi. QazAqparat bul týraly Polıtsııa departamentine silteme jasap habarlaıdy.

Polıtseıler turǵyndarǵa túsindirý jumystaryn júrgizip, karantın rejımin qadaǵalaıdy. Tártip buzýshylarǵa qoldanystaǵy zańnamaǵa sáıkes, sharalar qabyldanatyn bolady.
Sonymen qatar, polıtsııa qyzmetkerleri daýys zoraıtqysh arqyly da túsindirý júrgizedi.

«Daýys zoraıtqyshty qoldaný - azamattarǵa qoldanystaǵy erejeler men shekteýlerdi saqtaý qanshalyqty mańyzdy ekenin túsinýge múmkindik beredi dep esepteımiz. Qala turǵyndary karantın erejelerin qatań saqtaýy jáne barlyq qaýipsizdik sharalaryn ustanýy tıis. Infektsııanyń taralýyna jol bermeý kerek. Óz densaýlyǵyńyz ben jaqyndaryńyzdyń densaýlyǵy týraly oılanyńyz», - dep atap ótti polıtsııa departamentinen.

Patrýldeý baǵyttary barlyq ýchaskelerdi qamtı alatyndaı etip qurylǵan. Polıtsııa qyzmetkerleri barlyq turǵyn úıler aýlasy men adamdar kóp jınalatyn jerlerdi aralaıtyn bolady.

Eske salaıyq, Qazaqstanda koronavırýsqa qatysty epıdemıologııalyq ahýaldyń órshýine baılanysty bıylǵy 5 shildeden bastap 14 kúnge qatań shekteý sharalary engiziledi. Karantın odan ári uzartylýy nemese kúsheıtilýi múmkin.

Osyǵan baılanysty, QR Bas memlekettik sanıtarlyq dárigerdiń qaýlysy jarııalandy. QR ІІM basshysy qazaqstandyqtarǵa málimdeme jasady.

Karantın rejımi men sanıtarlyq-epıdemıologııalyq talaptardy buzǵany úshin jeke tulǵalarǵa 83 340 teńgege deıin, al kásipkerlerge 638 940 teńgege deıin aıyppul salynady.