«Nur-Sultan–Petropavl» trassasynda jol apatynan 1 adam kóz jumyp, 3 adam zardap shekti

KÓKShETAÝ. QazAqparat – Aqmola oblysy aýmaǵynda «Nur-Sultan – Petropavl» trassasynda jol apatynan 1 adam kóz jumyp, 3 adam túrli dene jaraqatymen aýrýhanaǵa tústi, dep habarlaıdy QazAqparat tilshisi.

Oblystyq Polıtsııa departamenti baspasóz qyzmetiniń málimetinshe, jol apaty bıylǵy jylǵy shildeniń 17-sinde «Nur-Sultan-Petropavl» tas jolynyń 180 shaqyrymynda Molodejnoe aýyly tusynda bolǵan.

«Mitsubishi Montero» kóligin basqarǵan Kókshetaý qalasynyń 35 jastaǵy turǵyny rýlge ıe bola almaı joldyń shetinde turǵan aıaldamaǵa soǵyldy. Jol apaty saldarynan Kókshetaý qalasynyń 42 jastaǵy turǵyny oqıǵa ornynda kóz jumdy. Al kólik júrgizýshisi men jolaýshy áıel (Kókshetaý qalasynyń 35 jastaǵy turǵyny) jáne 6 jasar qyz bala túrli dene jaraqatymen Aqmola oblystyq balalar aýrýhanasyna jetkizildi», - dedi vedomstvodan.

Anyqtalǵandaı, «Mitsubishi Montero» kóliginiń júrgizýshisi jaıaýlar jolyna toqtaǵan «Húundai Elantra» kóligimen soqtyǵysýdy boldyrmaý úshin oń jaqqa shuǵyl burylǵan.

«Qazirgi kezde Qylmystyq kodekstiń 345-babynyń 3-bóligi «kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» boıynsha sotqa deıingi tergeý júrgizilýde», - dep tolyqtyrdy vedomstvodan.

Aıta ketsek, budan buryn Aqmola oblysynda zaýyt aýmaǵynda gaz-aýa qospasy jarylyp, er adam zardap shekkeni týraly jazǵan bolatynbyz.