Nur-Sultan men Jezqazǵan arasyndaǵy áýe reısteriniń sany eki ese artady

NUR-SULTAN. QazAqparat - Ulytaý oblysynyń azamattary men ákimdiginen kelip túsken kóptegen ótinishterge, sondaı-aq QR Premer-Mınıstriniń birinshi orynbasary Roman Sklıardyń Ulytaý oblysynyń áýe qatynasyn damytý jónindegi tapsyrmasy aıasynda Avıatsııa komıteti áýe reısteriniń sanyn arttyrady, dep habarlaıdy QazAqparat.

Osylaısha 15 tamyzdan bastap bir avıakompanııa Nur-Sultan – Jezqazǵan baǵyty boıynsha oryndalatyn reıs sanyn aptasyna 3-ten 7-ge deıin kóbeıtetinin habarlady.

QR Prezıdentiniń Jarlyǵymen qurylǵan Ulytaý oblysynyń ortalyǵy men Qazaqstannyń astanasy arasyndaǵy áýe qatynasy eki eseden astam ulǵaıady.

Bul óńirdiń ekonomıkalyq jáne týrıstik áleýetin odan ári damytýǵa yqpal etedi.

QR IIDM Azamattyq avıatsııa komıteti Ulytaý oblysynyń Qazaqstannyń basqa da óńirlerimen kólik qatynasyn retteý jumysyn jalǵastyrady.