Nur-Sultan men Qosshydan keletin qoqys: Mınıstrlik zańsyz polıgonǵa túsinik berdi

NUR-SULTAN. QazAqparat – Aqmola oblysy Qosshy qalasynyń Taıtóbe kenti mańynda paıda bolǵan stıhııalyq qoqys úıindileri joıylady, dep habarlaıdy QazAqparat QR Ekologııa, geologııa jáne tabıǵı resýrstar mınıstrligine silteme jasap.

Vedomstvo ókilderi osy máselege baılanysty turǵyndarmen kezdesý ótkizdi. Oǵan Májilis depýtattary qatysty.

Kent turǵyndary Tselınograd aýdany aýmaǵynda zańdastyrylǵan polıgonnyń joqtyǵyna alańdaýly. Olar Nur-Sultan men Qosshy qalalarynan shyǵarylatyn turmystyq qatty qaldyqtardyń eldi meken mańyna ruqsatsyz tógilip jatqanyn alǵa tartady. Mundaı qoqystardan órt shyǵýy múmkin ekenine, qorshaǵan ortaǵa keri áseri baryna narazy.

Málim etilgenindeı, Ekologııa mınıstrligi jospar kestesin bekitken. Soǵan sáıkes jergilikti ákimdik stıhııalyq qoqys oryndaryn joıýy kerek.

Aýdan ákimdiginen Taıtóbe kentiniń janyndaǵy qoqys ornyn retke keltirýge 100 mln teńgeden astam qarajat bólingen. Joba boıynsha tıisti jumystar júrgizilip, aýmaqta shlagbaým jáne beınebaqylaý kameralary ornatylady.

Aıta ketsek, «Qazaqstan Ǵarysh Sapary» AQ sýretterine sáıkes, aýdan aýmaǵynan ótken jyly 316 ruqsatsyz qoqys úıindisi anyqtalyp, onyń 65% astamy joıylǵan.