Nur-Sultan men Almatydaǵy áskerı gospıtaldar COVID-19 statsıonaryna aınaldy
Baspasóz qyzmetiniń derekterine qaraǵanda, Qorǵanys mınıstrliginiń apparat keńesinde ótken aptada atqarylǵan jumystar qorytyndylanyp, taıaý kezeńge mindetter aıqyndaldy.
Bas qolbasshylar men qolbasshylar ótkizip jatqan jaýyngerlik daıarlyq is-sharalar, «Altyn jebe» arnaıy operatsııalar kúshterin tekserý barysy, Qurlyq áskerleri oqý-jattyǵý ortalyǵynyń kishi mamandaryn daıyndaý men olardyń áskerı bólimderge bólý týraly baıandady.
Qorǵanys vedomstvosynyń basshysy Qarýly Kúshterdiń túrli bólimderi men bólimsheleriniń jaýyngerlik oqý-jattyǵýy barysynda ózara is-qımyl máselelerin pysyqtaýǵa nazar aýdardy.
Atap aıtsaq, Áskerı-teńiz kúshteriniń bas qolbasshysyna áskerı mindetterdi oryndaýda, oqý-jattyǵýlar men atys júrgizý kezinde Qurlyq áskerlerimen neǵurlym ózara tyǵyz is-qımyldy uıymdastyrýǵa nusqaý berldi.
Elimizdiń batys óńirlerine jumys babymen barǵan kezde Qorǵanys mınıstri, áskerı obektilerdiń ústinen drondar men ushqyshsyz ushý qurylǵylarynyń ruqsatsyz ushýyna jol bermeý sharalaryn kúsheıtý týraly mindetter qoıdy. Osy maqsatta táýliktik narıad adamdarynyń qyraǵylyǵyn arttyrý, drondarǵa qarsy myltyqtardy, radıoelektrondyq kúres quraldaryn, sondaı-aq qarýly mobıldi toptardy qoldaný jaıy talqylandy.
Kúnniń jylynýyna qaraı, sý tasqyny, sondaı-aq, taýly jerlerde qar kóshkininiń oryn alýy múmkin. Osyǵan baılanysty, bas qolbasshylarǵa Tótenshe jaǵdaılar mınıstrliginiń óńirlik bólimshelerimen ózara turaqty is-qımyldy uıymdastyrý, tabıǵı appattardyń saldaryn joıý úshin jumyldyrylýǵa tıisti kúshter men quraldardyń esebin naqtylaý tapsyryldy. Buǵan aýyr áskerı kólikter, neǵurlym daıarlanǵan áskerı qyzmetshiler men áskerı-medıtsınalyq personal tartylady.
Budan basqa da, áskerı qalashyqtardaǵy turǵyndardyń jáne jaýyngerlik daıarlyq sabaqtary ótkiziletin aýdandardaǵy, ásirese taýly jerlerdegi jeke quramnyń qaýipsizdigin qamtamasyz etý mindeti qoıyldy.
Densaýlyq saqtaý mınıstrliginiń suraýyna sáıkes, ótken jyldaǵydaı ınfektsııalyq statsıonar retinde elordadaǵy Bas áskerı klınıkalyq gospıtal men Almatydaǵy áskerı-klınıkalyq gospıtal jabdyqtaldy. Onda jalpy 300 tósek ornalastyrylǵan. Bas áskerı-medıtsınalyq basqarma bastyǵynyń aıtýynsha, mekemeler alǵashqy patsıentterdi qabyldaı bastady.
Barlyq áskerı gospıtaldar men aýrýhanalardyń COVID-19-ǵa qarsy is-sharalarda qorǵanys vedomstvosynyń basshysy, halyqtyń densaýlyǵyn saqtaýǵa kómektesý úshin daıyndyq júrgizýdi tapsyrdy.
Ótken jyldyń tájirıbesin eskere otyryp sondaı-aq, áleýmettik mańyzy bar nysandardy dezınfektsııalaý úshin RHBZ áskerleriniń bólimsheleri men áskerı tehnıkasyn jumyldyrý múmkindigine nazar aýdaryldy.