Nur-Sultan men Almatyda «omıkron» shtamy anyqtaldy

NUR-SULTAN. QazAqparat - 2022 jyldyń 6 qańtarynda Nur-Sultan qalasyndaǵy «Ulttyq saraptama ortalyǵy» sharýashylyq júrgizý quqyǵyndaǵy respýblıkalyq memlekettik kásiporny fılıalynyń Molekýlıarlyq-genetıkalyq zertteýler zerthanasy 96 oń úlgini genomdyq sekvenırleýdi aıaqtady.

Genotıpteý nátıjeleri boıynsha 8 (8,3%) úlgide Omicron koronavırýsynyń jańa nusqasy anyqtaldy, onyń ishinde Almaty qalasynda - 7 jáne Nur-Sultan qalasynda - 1, dep habarlaıdy QazAqparat QR Densaýlyq saqtaý mınstrliginiń basasóóz qyzmetine silteme jasap.

Synamalardyń 71%-da «Delta», 16%-da «Delta plıýs» koronavırýs shtamynyń nusqalary, 4,7%-da koronavırýs shtamynyń basqa nusqalary anyqtaldy.

«Omıkron» nusqasynyń ereksheligi - joǵary ınfektsııalyq taralýy (taralý koeffıtsıenti 1:5 teń), qaıta juqtyrý qaýpiniń joǵarylaýy. Joǵary tynys alý joldarynda (osy jerde vırýs bastapqyda enedi) «Omıkron» «Delta» nusqasyna qaraǵanda 70 ese jyldam kóbeıedi.

Infektsııadan qorǵaýdyń jalǵyz joly - vaktsınatsııanyń aıaqtalǵan kýrsy jáne COVID-19-ǵa qarsy ýaqtyly revaktsınatsııa.

Sonymen qatar, vırýstyń taralý qaýpin azaıtý úshin barlyq profılaktıkalyq sharalardy saqtaý qajet: betperde taǵý, áleýmettik qashyqtyqty, qol gıgıenasyn saqtaý, úı-jaılardy jeldetý jáne t.b.

Dúnıejúzilik densaýlyq saqtaý uıymynyń málimeti boıynsha, 2022 jylǵy 6 qańtardaǵy jaǵdaı boıynsha álemniń 126 elinde «Omicron» SARS-CoV-2 shtammy anyqtaldy.