Nur-Sultan mektepterinde erekshe qajettiligi bar balalardyń 80% áleýmettik qoldaýmen qamtylǵan

NUR-SULTAN. QazAqparat - Elordada tirkeýde turǵan 18 jasqa deıingi erekshe bilim berý qajettiligi bar 9 073 balaǵa arnalǵan biryńǵaı baza quryldy. Bıylǵy oqý jylynda olardyń 80 % oqytylyp, tárbıelenedi, sonymen qatar kepildendirilgen kómek pen qajetti qoldaý kórsetiledi, dep habarlaıdy qala ákimdiginiń saıty.

Nur-Sultan qalasy ákiminiń orynbasary Baqtııar Mákenniń qatysýymen bilim mekemeleriniń basshylary elordadaǵy ınklıýzıvti bilim berýdi damytý máselelerin talqylady. Negizinen bilim oshaqtaryndaǵy pandýs, lıft máseleleri sóz bolyp, jalpy bilim berý protsesine qosylǵan balalardy psıho-pedagogıkalyq jaǵynan qoldaý kórsetý jáne pedagogıkalyq kadrlardy daıyndaý turǵysynda aıtyldy.

Sondaı-aq mamandar oqytý mekemelerinde tıisti materıaldy-tehnıkalyq bazany jabdyqtap, arnaıy qurylǵylarmen qamtamasyz etpeı, ınklıýzıvti bilimniń áserli bolýy múmkin emes ekenin atap ótti.

Elordalyq Bilim basqarmasynyń basshysy Sholpan Qadyrovanyń málimetinshe, 17 mektepte lıft ornatylǵan, sonyń ishinde 8 mekteptegi lıft ınklıýzıvti ortaǵa saı beıimdelmegen. №65 mektep-gımnazııasyndaǵy erekshe bilim berýmen qamtylǵan 58 balany tasymaldaý úshin 10 ınvataksı qyzmet kórsetedi.

Sonymen qatar arnaıy mektep-ınternat úshin avtobýstar bólingen. 22 jalpy bilim beretin mektepterde logoped, psıholog, defektolog, tıflopedagogtardyń súıemeldeýimen oqytylatyn arnaıy korrektsııalyq synyptar bar. 10 memlekettik mektepke deıingi mekemede pedagog-psıholog pen defektolog-muǵalim, logoped-muǵalimniń qosymsha shtattyq birligi engizilgen korrektsııalyq toptar ashyldy. Alǵashqy ret jekemenshik balabaqshalarda erekshe balalarǵa arnalǵan toptardy ashý jóninde memlekettik tapsyrys engizildi.

Qala ákiminiń orynbasary Baqtııar máken jyl sońyna deıin elorda mektepterindegi ınklıýzıvti bilim berýdi 100 paıyz qamtý qajet ekenin atap ótti.

«Memleket basshysy Qazaqstan halqyna arnaǵan óziniń Joldaýynda erekshe qajettiligi bar adamdarǵa birdeı múmkindik qarastyryp, múmkindigi shekteýli balalary bar otbasylaryna ınklıýzıvti qoǵam qurýdyń mańyzy zor ekenin aıtty.Búginde Nur-Sultanda 26 myńnan asa múmkindigi shekteýli adam turady, onyń 5 500-i – balalar. Qalada ortalyqtar ashylyp, olardy memleket jabdyqtarmen qamtyp, qomaqty qarjy da bólinip, qorlar da jumys júrgizip jatyr. Biraq ókinishke qaraı erekshe balalardy jábirleý áli de bar.Osy boıynsha biz jumys isteıtin bolamyz. Qala basshysy tıisti tapsyrma berdi. Úkimetten de qoldaý bar. Bıyl eki ońaltý ortalyǵynyń qurylysy bastalady. Túrli baǵyttaǵy aýrý boıynsha eresekter men balalarǵa da profılaktıkalyq, ońaltý emi qajet bolǵandyqtan, qala úshin ońaltý ortalyǵynyń qurylysy óte mańyzdy. Investorlar qarjysyna jańa ıppoterapııa ortalyǵyn salatyn bolamyz», – dedi ol.