Nur-Sultan qalasynda terakt uıymdastyrmaq bolǵan er adam qolǵa tústi

NUR-SULTAN. QazAqparat – Elordada terakt uıymdastyrmaq boldy degen kúdikpen er adam ustaldy, dep habarlaıdy QazAqparat QR UQK baspasóz qyzmetine siltememen.

«2020 jylǵy 25 naýryzda Ulttyq qaýipsizdik komıteti Nur-Sultan qalasynda jedel-izdestirý is-sharalarynyń nátıjesinde destrýktıvti dinı aǵym ustanýshysyn ustady. Ol «DAISh» halyqaralyq terrorıstik uıymy (Qazaqstanda tyıym salynǵan) ıdeologııasynyń yqpalymen astana aýmaǵynda terakt daıyndady dep kúdiktelýde. Tergeý is-qımyldary barysynda odan joıý elementteri bar qoldan jasalǵan jarylǵysh qurylǵy alyndy» delingen habarlamada.

Málimetke saı, qolǵa túsken adamǵa qatysty Qazaqstan Respýblıkasy Qylmystyq kodeksiniń 24 jáne 255 (terrorızm aktisine daıyndalý) baptary boıynsha sotqa deıingi tergep-tekserý bastaldy. Tergeý jalǵasýda.