Nur-Sultan qalasynda ózin órtegen áıel aýrýhanaǵa jatqyzyldy

NUR-SULTAN. QazAqparat – Elordadaǵy QR Іshki ister mınıstrligi ǵımaraty janynda áıel óz-ózin órtep jiberdi, dep habarlaıdy QazAqparat tilshisi Nur-Sultan qalasy polıtsııa departamentiniń baspasóz qyzmetine silteme jasap.

«11 sáýir kúni saǵat 16:38-de «102» pýltine QR ishki ister mınıstrligi ǵımaratynyń janynda birneshe áıel ózin-ózi órtegeli jatqany týraly habarlama kelip tústi. Oqıǵa ornyna polıtsııa qyzmetkerleri men «Almaty» aýdany ákimdiginiń ókili keldi. Narazylyq bildirýshiler Almaty qalasynda bolǵan qylmystyq iske qatysty shara qabyldaýdan bas tartqan jaǵdaıda óz-ózderin órteımiz dep málimdedi», - delingen habarlamada.

Qalalyq departamenttiń málimetinshe, polıtsııa qyzmetkerleri jınalǵandarǵa jaǵdaıdy túsindirýge tyrysqan.

«Sol sátte uıymdastyrýshylardyń biri ózine suıyqtyq shasha bastaǵan. Óz kezeginde ýchaskelik polıtsııa ınspektory áıel ózin órteýge jol bermeý úshin jedel áreket etti. Degenmen órt áıeldi sharpyp úlgerdi. Zardap shegýshige alǵashqy medıtsınalyq kómek kórsetilip, aýrýhanaǵa jatqyzyldy. Sonymen qatar polıtsııa qyzmetkeri de qolyn kúıdirdi», - deıdi baspasóz qyzmeti.

Atalǵan fakti boıynsha QR QK 105-baby boıynsha sotqa deıingi tergeý bastaldy.