Nur-Sultan qalasynda oqý jylynan bastap 92 mektep karantınge jabyldy

NUR-SULTAN. QazAqaparat – Naýryz aıynda offlaın rejıminde oqıtyn oqýshylar arasynda aýrýshańdyq 10% artty. Bul týraly Ortalyq kommýnıkatsııalar qyzmetinde ótken brıfıngide aıtyldy, dep habarlaıdy QazAqparat tilshisi.

«29 naýryzdaǵy jaǵdaı boıynsha, oqý jylynyń basynan bastap oqýshylar arasynda 1654 COVID-19 jaǵdaıy tirkeldi, onyń 515 (+16) nemese 31% -y – offlaın rejıminde oqıtyn oqýshylar, 1114 (+25) jaǵdaı nemese 69%-y – qashyqtyqtan bilim alatyn oqýshylar. Demek, naýryz aıynda offlaın rejıminde oqıtyn oqýshylar arasynda aýrýshańdyq 10% artty», - deıdi Sanıtarlyq-epıdemıologııalyq baqylaý departamentiniń basshysy, Nur-Sultan qalasynyń bas sanıtarlyq dárigeri Sarhat Beısenova.

Onyń aıtýynsha, Nur-Sultan qalasynda oqý jylynan bastap 92 mektep karantınge jabyldy.

«Mektepke deıingi mekemelerge baratyn balalar arasynda 170 jaǵdaı tirkeldi. 104 mektepke deıingi mekeme karantınge jabyldy, onyń ishinde 95 top bar. Qazirgi ýaqytta 19 mektepke deıingi mekeme, onyń ishinde 16 top karantın rejıminde qalyp otyr», - deıdi ol.