Nur-Sultan qalasy komendantynyń buıryǵy shyqty

NUR-SULTAN. QazAqparat – Nur-Sultan qalasynyń komendanty Erjan Sádenovtiń Nur-Sultan qalasyndaǵy Tótenshe jaǵdaı rejımi týraly buıryǵy shyqty, dep habarlaıdy QazAqparat tilshisi.

Qujatta tótenshe jaǵdaı kezeńindegi Nur-Sultan qalasy komendatýrasy apparatynyń quramy bekitilgeni aıtylǵan.

Tótenshe jaǵdaı rejımi kezeńinde tıisti organdar men mekemelerge mynadaı sharalar men shekteýler engizý mindetteldi:

Nur-Sultan qalasynyń polıtsııa departamenti qoǵamdyq tártipti saqtaýdy kúsheıtsin;

Nur-Sultan qalasynyń mamandandyrylǵan kúzet qyzmetiniń basqarmasy asa mańyzdy memlekettik jáne strategııalyq obektilerdi, sondaı-aq halyqtyń tynys-tirshiligin qamtamasyz etetin obektilerdi jáne kóliktiń jumys isteýin kúzetýdi kúsheıtsin;

Jergilikti polıtsııa qyzmeti basqarmasyna patrýldik polıtsııa polkiniń jáne mamandandyrylǵan patrýldik polıtsııa batalonynyń, «Almaty», «Baıqońyr», «Esil» jáne «Saryarqa» aýdandaryndaǵy polıtsııa basqarmalarynyń komandırleri:

- Astananyń tynys-tirshiligin jáne kóliktiń jumys isteýin qamtamasyz etý jónindegi is-sharalarǵa tartylǵan adamdar men kólik quraldaryn qospaǵanda, Nur-Sultan qalasynda saǵat 23.00-den bastap saǵat 07.00-ge deıingi kezeńde júrip-turý, onyń ishinde kólik quraldarynyń erkindigine shekteýler belgilesin;

- jeke tulǵalardyń jeke basyn kýálandyratyn qujattaryn qujattardy, jeke basyn, olardyń zattaryn, kólik quraldaryn tekserýdi qamtamasyz etsin.

Nur-Sultan qalasynyń polıtsııa departamenti Nur-Sultan qalasynyń qorǵanys isteri jónindegi departamentimen birlesip qalaǵa kirýdi, sondaı-aq, astanadan kelip-ketetin barlyq baǵyttarǵa blokpost ornatý arqyly ótetin qozǵalysty shektesin.

Nur-Sultan qalasynyń ákimdigi:

- beıbit jınalystardy, oıyn-saýyq, sporttyq jáne basqa da buqaralyq is-sharalardy uıymdastyrýǵa jáne ótkizýge tyıym salýǵa;

- ereýilderge jáne zańdy tulǵalardyń qyzmetin toqtatý áreketterine tyıym salýǵa;

- qarýdy, oq-dárilerdi, jarylǵysh zattardy, arnaıy quraldardy, ýly zattardy satýǵa tyıym salýǵa, dárilik, esirtki quraldarynyń, psıhotroptyq zattardyń, prekýrsorlardyń, sondaı-aq etıl spırtiniń, alkogol óniminiń aınalymyna erekshe rejım belgileýge;

- qoǵamdyq kóliktiń shtattyq rejımdegi jumysyn qamtamasyz etýge quqyly.

Ákimshilik polıtsııa basqarmasy jeke tulǵalardan qarý men oq-dárilerdi, al zańdy tulǵalardan qarý, oq-dári, ýly zattarmen qatar jaýyngerlik jáne oqý áskerı tehnıkasyn, jarylǵysh jáne radıoaktıvti zattardy ýaqytsha alyp qoıýdy qamtamasyz etsin.

Nur-Sultan qalasynyń ákimdigi is-sharalardy uıymdastyrýǵa baılanysty shyǵystarǵa aqshalaı qarajat bólýdi qamtamasyz etsin.