Nur-Sultan qalasy ákiminiń orynbasary Asqar Amrın qyzmetinen ketti
«Búgin – meniń Nur-Sultan qalasy ákiminiń orynbasary retindegi sońǵy jumys kúnim. 5 jyl 4 aı – az ýaqyt emes, bul meniń ómirim men mansabymdaǵy mańyzdy kezeń. Birinshi kezekte elorda turǵyndaryna jáne qyzmet babymen azamattardy qabyldaýda, qalany aralaýlarda, halyqtyń arasynda, «Januıa» ortalyǵynda, obektilerde birge jumys jasaǵan, tildesken, máselelerdi sheshisken barsha janǵa alǵysymdy aıtamyn. Bul – baǵa jetpes ómirlik tájirıbe.
Men ekonomıka jáne quqyq qorǵaý organdary máselelerine, sonymen qatar úlestik qurylystyń problemaly obektileriniń qarjylandyrylýyn qamtamasyz etý máselelerine jetekshilik ettim. Problemaly obekt úleskerlerine aıtpaǵym: biz sizdermen birge úlken jumys atqardyq: obektilerdiń kópshiligi tapsyryldy, úleskerler óz kiletterin aldy, belgili bir ýaqytty qajet etetin qujattardy rásimdeý isteri ǵana qalyp otyr. EQK ári qaraı da problemaly obektilerdi aıaqtaý boıynsha óz jumysyn jalǵastyrady jáne jáne sizder de kópten kútken úılerińizge qol jetkizesizder!» - dep jazdy Asqar Amrın.
Sonymen qatar ol memlekettik qyzmet ózektiligin joǵaltýda ekenine toqtaldy.
«Memlekettik qyzmet – bul úlken eńbek. Mysaly, aýdandyq ınspektor kúndelikti óz aýdanyn aralap, bir qaraǵanda kózge baıqala bermeıtin kúrdeli jumys atqarady. Bálkim ózgerýimiz qajet shyǵar, ashyǵyraq bolyp, táýlik boıy atqaryp júrgen jumysty kóbirek jarııalaý kerek shyǵar, tek popýlızmnen aýlaq bolyńyzdar. Sizge jáne otbasylaryńyzǵa shydamdylyq, densaýlyq jáne amandyq tileımin»,- dep tolyqtyrdy jazbasyn.