Nur-Sultan ataýy astanamyzdyń abyroıyn asqaqtatady - ShQMTÝ ustazdary

ÓSKEMEN. QazAqparat - D.Serikbaev atyndaǵy Shyǵys Qazaqstan memlekettik tehnıkalyq ýnıversıtetiniń ujymy el astanasynyń qaıta atalýyn ýaqyt talaby dep esepteıdi, dep habarlaıdy QazAqparat tilshisi.

Ustazdar men ǵalymdar Elordaǵa Tuńǵysh Prezıdenttiń esimin berý Nursultan Nazarbaevtyń elge sińirgen ólsheýsiz eńbegine bildirgen mol alǵystyń bir bóligi ǵana degen pikirde.

«Qazaqstan álemdik arenadan óz ornyn oıyp turyp aldy. Bul jerde Turǵysh Prezıdentimizdiń úlesi ushan-teńiz. Táýelsizdik Qazaqstan halqyna bereke-birlik pen damýdyń naqty kórinisin ákeldi. Munyń bári Elbasy júrgizgen sarabdal saıasattyń, ıgi bastamalardyń arqasy. Elbasy tikeleı basqarǵan memlekettik baǵdarlamalar elimizdiń syndarly kezeńde aıaqtan turyp ketýine yqpal etti» - deıdi ýnıversıtet rektory Jasulan Shaımardanov.

Rektordyń aıtýynsha, Tuńǵysh prezıdent irgesin qalaǵan Astana qalasy az ýaqyttyń ishinde beıbitshilik pen kelisimniń sımvolyna aınalyp úlgergen. Jahandyq kólemdegi mańyzdy oqıǵalardyń Elordada ótýi de Elbasynyń tulǵasymen tikeleı baılanysty.

«Astana - bizdiń maqtanyshymyz, betke ustar brendimiz. Ony qaıta ataý arqyly biz Tuńǵysh Prezıdentke bildirer alǵystyń bir parasy ǵana. Nur-Sultan ataýy - jańa bolsa da búkil álemge tanymal esim. Álem kartasyna engen jańa ataý jańa sapanyń, úzdiksiz damýdyń belgisine aınalaryna senimdimiz» - deıdi J.Shaımardanov.