Nur-Sultan, Almaty jáne Shymkent qalalarynyń quzyreti keńeıdi

NUR-SULTAN. QazAqparat - Qazaqstan Respýblıkasynyń birqatar zańnamalyq aktilerine ózgerister engizildi. Bul týraly QR Ulttyq ekonomıka mınıstrliginiń baspasóz qyzmetine silteme jasap QazAqparat habarlaıdy.

2019 jylǵy 27 jeltoqsanda Memleket basshysy «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń ákimshilik-aýmaqtyq qurylysy, memlekettik basqarý júıesin jáne bıýdjetaralyq qatynastardy jetildirý, kredıtteý jáne bilim berý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy.

Ulttyq ekonomıka mınıstrliginde bul zań QR Prezıdentiniń jekelegen jarlyqtaryn, joldaýlaryn iske asyrý úshin ázirlenip, myna máselelerdi sheshedi:

— fıskaldyq ortalyqsyzdandyrý sheńberinde shaǵyn jáne orta bıznesten túsetin korporatıvtik tabys salyǵynyń túsimderin jergilikti bıýdjetterge berý;

— Qazaqstan Respýblıkasy Memlekettik kúzet qyzmeti men Qazaqstan Respýblıkasy «Syrbar» Syrtqy barlaý qyzmetindegi qaıta uıymdastyrý;

— ekinshi deńgeıli bankter men mıkroqarjylyq uıymdarǵa merzimi 90 kúnnen asyp ketken kepilsiz tutynýshylyq qaryzdar boıynsha qyzmet kórsetýde turaqsyzdyq aıybyn (aıyppul, ósimaqy), komıssııalar men ózge de tólemderdi esepteýge jáne talap etýdi belgileý;

— respýblıkalyq mańyzy bar qalalar men astananyń quzyretin keńeıtý;

— bilim berý mekemelerin basqarý jáne bıýdjettik ákimshilendirý fýnktsııalaryn aýdandyq deńgeıden oblystyq deńgeıge berýdi sheshý.

Avtorlar habarlaǵandaı, zań arqyly 5 kodeks pen 25 zańǵa túzetýler engiziledi.

Zań astananyń atynyń ózgerýine, bıýdjetaralyq qatynastardy jetildirýge, respýblıkalyq mańyzy bar qalalar men astananyń quzyretin keńeıtýge, sondaı-aq bilim bólimderin basqarý fýnktsııasyn qaıta bólýge baılanysty keıbir zańnamalyq aktilerdiń jekelegen normalaryn sáıkestendirýge múmkindik beredi.

Qujattyń mátinin mınıstrliktiń resmı saıtynan oqı alasyzdar.