Nur-Sultan, Almaty jáne Shymkent qalalarynda maska tegin taratyldy

NUR-SULTAN. QazAqparat – 2020 jyldyń 28 naýryzynda maska óndirisiniń táýliktik kólemi 773 myń danany qurady. Onyń ishinde farmatsevtıkalyq kásiporyndar – 228 myń, tigin kásiporyndary – 545 myń medıtsınalyq maska tigýde, dep habarlaıdy QazAqparat tilshisi.

«Aqparat «SK-Farmatsııa» JShS-ǵa beriledi, olar medıtsınalyq maskalardy ótkizýdi júzege asyrady. Densaýlyq saqtaý mınıstrligi óndirilgen ónimdi elimizdiń óńirleri boıynsha bóledi. Dáke jáne mata maskalary jergilikti atqarýshy organdarmen shart negizinde satylady. Sonymen qatar, «Biz birgemiz» qaıyrymdylyq aktsııasy aıasynda «Mega Pharma» JShS farmatsevtıkalyq kásiporny Nur-Sultan, Almaty jáne Shymkent qalalarynyń turǵyndaryna tegin 100 000-nan astam medıtsınalyq maska taratty», - delingen QR IIDM habarlamasynda.

Belgili bolǵandaı, Túrkistan oblysyndaǵy Kentaý qalasynda eriktiler uıymdary 20000 betperde taratty.

Búgingi kúni medıtsınalyq maskalardy óndirý jumystary otandyq myna kásiporyndarmen táýlik boıy júrgiziledi: «Dolce» JShS (Almaty obl.), «Super-pharm» JShS (Jambyl obl.), «Mega Pharma» JShS (Jambyl obl.), «Medical Active Group» JShS (Almaty q.), «Merýsar» JShS (Pavlodar q.), «TK-Farm Aqtóbe» JShS (Aqtóbe q.).

Sonymen qatar, maskalar óndirisine jergilikti atqarýshy organdarmen birlesip 70-ten astam tigin kásiporyndary tartyldy: «Dalatex» JShS (Qyzylorda q.), «Bolshevıchka» JShS (Qostanaı q.), «Eko-Farm» JShS (Shymkent q.), «As Farm» JShS (ShQO), «Tynys» AQ (Kókshetaý q.), «KazLegProm» JShS (Almaty q.), «Janarys» JShS (Mańǵystaý oblysy) jáne basqalary jumyldyryldy.

«Búginde barlyq farmatsevtıkalyq jáne tigin kásiporyndarynyń qýaty tolyq júkteme kezinde táýligine 1 mln maskaǵa deıin óndirýge múmkindik beredi. Tigin jáne farmatsevtıkalyq kásiporyndardy maskalar óndirisi úshin shıkizatpen qamtamasyz etý maqsatynda QR Indýstrııa jáne ınfraqurylymdyq damý mınıstrligi «Azala Textile» JShS-men birlesip dáke óndirisin iske qosý máselesi pysyqtaldy. Búgingi kúni qýattylyǵy táýligine 3,6 myń seldir mata shyǵaratyn 3 stanok iske qosyldy», - dep atap ótilgen vedomstvo málimetinde.

Óndiristik tsıkl memleketaralyq standartqa sáıkes jolǵa qoıylǵan (MEMST 9412-93 medıtsınalyq dáke). Sondaı-aq, kásiporyn tómen tyǵyzdyqtaǵy aǵartylǵan maqta matasyn shyǵarady.

Budan bólek, dezıınfektsııalyq quraldar týraly aıta ketsek, bıyldyń 28 naýryzynda 94 332 lıtr óndirilgen, qoımada 144 200 lıtr bar. Dárihana jelilerine, kósheler men úı-jaılardy dezınfektsııalaý úshin 100 093 lıtr tıelgen.