Nur-Sultan, Almaty, Shymkent mańyndaǵy aýyl azamattaryna Jol kartasy aıasynda 85 myń teńgeden beriledi

NUR-SULTAN. QazAqparat – Qazaqstan Prezıdenti Qasym-Jomart Toqaev Nur-Sultan, Almaty jáne Shymkent qalalarynyń mańynda (aýyldarda) eńbekke jaramdy azamattarǵa 2 mınımaldy aılyq kóleminde aqsha beriletinin málimdedi, dep habarlaıdy QazAqparat tilshisi.

«Qazirgi ýaqytta karantınge baılanysty Nur-Sultan, Almaty jáne Shymkent qalalarynyń mańynda eńbekke jaramdy azamattardyń kóptigi baıqalady. Eń aldymen jastar kóp. Sondyqtan Úkimet pen ákimder dál osy aımaqtarda «Jumyspen qamtýdyń jol kartasy» sheńberinde naqty jobalardy bastaýy kerek. Azamattarda aqsha tabý múmkindigi bolýy tıis. Olar jabylyp qalǵan shlagbaýmda otyrmaýy tıis», - dedi Memleket basshysy halyqqa úndeýinde.

Prezıdent eńbekke jaramdy azamattarǵa «Jumyspen qamtýdyń jol kartasy» baǵdarlamasy aıasynda jumysqa kelgennen-aq 2 mınımaldy aılyq kóleminde kóterme aqy beriletinin (85 myń teńge) jetkizdi.

«Bul aılyqqa qosymsha aqy retinde beriledi», - dedi ol.