Nur-Sultan ákiminiń bilim grantyna 883 mln teńge bólinýi múmkin

NUR-SULTAN. QazAqparat – Nur-Sultan qalasy ákiminiń 2022-2026 jyldarǵa arnalǵan grantyna qosymsha 883,8 mln teńge bólinýi múmkin. Nur-Sultan qalasy bilim basqarmasy basshysynyń orynbasary Narıman Elamanov bıýdjetti naqtylaý kezinde osyndaı usynys aıtty, dep habarlaıdy QazAqparat tilshisi.

«Qazirgi tańda bilim basqarmasynyń bıýdjeti -149 mlrd teńge. Oǵan qosymsha 4,4 mlrd teńge bólingen bolatyn. Biz 22,2 mlrd teńge qajettigin aıtyp, ótinim berdik. Surap otyrǵan qosymsha qarajattyń negizgi somasy eńbekaqyǵa, dızel otyny men kommýnaldyq qyzmet qunynyń ósýine baılanysty kommýnaldyq qyzmetterge qajet. Sondaı-aq, beınebaqylaý kameralaryna, materıaldyq jabdyqtaýǵa qosymsha 3 mlrd teńge surap otyrmyz. Talaı jyldan beri materıaldyq jabdyqtarymyz jańartylǵan joq», - dedi basqarma ókili.

Sondaı-aq, Narıman Elamanov vedomstvoǵa baǵynysty uıymdardyń keńse taýarlaryn satyp alýyna dep qosymsha 3 mlrd teńge surady.

Onyń ishinde tamaq ónimderin satyp alýǵa 1,5 mlrd teńge, dári – dármekterge 100 mln teńge, balalar jylyna arnalǵan sharalar ótkizýge 2 mlrd 200 mln teńge qajet ekenin aıtty.

Al qala ákimniń 2022-2026 jyldarǵa arnalǵan grantyna 883,8 mln teńge suralyp otyr.

Atalǵan sharada qalalyq tilderdi damytý jáne arhıv isi basqarmasynyń basshysy Sáken Esirkep bıýdjetti naqtylaý kezinde qosymsha 310 mln teńge surady.