Nur-Sultan ákimdiginiń shtaty da, bıýdjeti de qysqartylady

NUR-SULTAN. QazAqparat - Nur-Sultan qalasy ákimdiginiń shtaty men bıýdjeti qysqartylady. Bul týraly «Habar-24» telearnasynyń tikeleı efırinde Nur-Sultan qalasynyń ákimi Altaı Kólginov aıtty, dep habarlaıdy QazAqparat tilshisi.

«Memleket basshysynyń tapsyrmasyna sáıkes, kvazımemlekettik sektorda, sonymen qatar apparattyń ishinde de shtattyq qurylym men bıýdjetti ońtaılandyrý júrgizilip jatyr. 17 zańdy tulǵa ońtaılandyryldy. Sonymen qatar bıýdjet qaıta qaralyp, ónimsiz shyǵystar 27 mlrd teńgege qysqartyldy. Qazirgi ýaqytta taǵy 7 mlrd teńgeni qysqartý baǵytynda jumys júrgizip jatyrmyz», - dedi elorda ákimi.

Onyń atap ótýinshe, jalpy ońtaılandyrylatyn qarajat somasy 35 mlrd teńgeni quraıdy.

«Bul qarajat aldymyzda turǵan áleýmettik mańyzy bar ınfraqurylymdyq mindetterdi sheshýge jumsalatyn bolady. 14 mlrd teńgeden astam qarajat ınjenerlik ınfraqurylymǵa, 3,5 mlrd teńge bilim berý júıesin qoldaýǵa, densaýlyq saqtaý men áleýmettik jumystarǵa, sonymen qatar 3 mlrd teńgeden astam qarajat shaǵyn jáne orta bıznesti qoldaýǵa, azyq-túlik qaýipsizdigin sýbsıdııalaýǵa baǵyttalady», - dedi Altaı Kólginov.