«Nur Otanǵa» 20 jyl: Naqty nátıjeniń partııasyna aınaldy

ASTANA. QazAqparat - Bıyl «Nur Otan» partııasynyń 20 jyldyǵy atap ótilýde. Osy ýaqyt ishinde ol qazirgi zamanǵy talaptarǵa saı qalyptasyp, jańa ári zamanaýı turpatty partııaǵa aınaldy. Bul turǵyda «Nur Otan» Elbasy Nursultan Nazarbaevtyń strategııalyq baǵdarynyń tıimdi jetekshisi bola alǵany belgili. Atap aıtqanda, Astanada 27 aqpan kúni «Nur Otan» partııasynyń kezekti XVIII sezi ótedi. Kezekti sezd partııanyń 20 jyldyǵyna oraı uıymdastyrylyp otyr. Bul rette osy saıası uıymnyń tarıhyna sholý jasaýdy jón kórdik.

Esterińizde bolsa, 1998 jyldyń 21 qazanynda Qazaqstan Respýblıkasynda «Qazaqstan Prezıdenttigine kandıdat Nursultan Ábishuly Nazarbaevqa qoldaý kórsetý qoǵamdyq shtaby» qoǵamdyq qozǵalysy jumysyn bastady. Saılaýaldy naýqan kezinde shtab belsendi jumys istedi. Sondaı-aq, saıası partııalarmen jáne qozǵalystarmen yntymaqtastyq ornatty. Atalǵan jumystar barysynda belgili memleket jáne saıası qaıratkerler - S.A.Tereşenko, G.I.Dýnaev, H.Sh.Taqýov belsendiligimen kózge tústi. Dál osy kezeńde qoǵamdyq qozǵalysty saıası partııaǵa aınaldyrý ıdeıasy týraly pikirler aıtyla bastady.

Osyǵan baılanysty 1999 jyly 19 qańtarda arnaıy otyrys ótip, onda Qoǵamdyq shtabty «Otan» respýblıkalyq saıası partııasy» retinde qaıta qurý sheshimi qabyldandy. Al 1999 jyldyń 12 aqpanynda partııa Qazaqstan Respýblıkasynyń zańnamasyna saı Ádilet mınıstrligine tirkeldi.

«Dál osy data partııanyń jumysy bastalǵan kún retinde Táýelsiz Qazaqstannyń jańa tarıhyna jazyldy. Partııanyń muraǵatynda Nursultan Ábishuly Nazarbaevtyń 1999 jyldyń 22 aqpanynda «Otan» respýblıkalyq saıası partııasynyń múshesi retinde tirkelgen kartasy saqtaýly tur», - dep atap ótilgen «Nur Otan» partııasynyń málimetinde.

Budan keıin, 1999 jyldyń 1 naýryzynda jańa partııanyń І quryltaı sezi ótip, onda QR Prezıdenti Nursultan Nazarbaev partııanyń Tóraǵasy bolyp saılandy. Odan bólek, Saıası keńes pen Ortalyq tekserý komıssııasynyń quramdary bekitilip, partııanyń Jarǵysy qabyldandy. Sondaı-aq sezd delegattary «Otan» respýblıkalyq saıası partııasy, Qazaqstannyń Halyqtyq birlik partııasy, Qazaqstan demokratııalyq partııasy, Qazaqstan lıberaldyq qozǵalysy jáne «Qazaqstan-2030 úshin» qozǵalysynyń birigýi týraly tarıhı mańyzǵa ıe Rezolıýtsııany qabyldady.

Araǵa biraz jyl salyp, ıaǵnı 2002 jyly 9 qarasha kúni Almaty qalasynda ótken «Otan» respýblıkalyq saıası partııasynyń kezekten tys IV sezinde «Otan» RSP-ǵa Qazaqstannyń Halyqtyq-kooperatıvtik partııasy men Respýblıkalyq eńbek partııasynyń qosylýy týraly qaýly qabyldandy. Al 2006 jyly 4 shildede Astana qalasynda «Otan» respýblıkalyq saıası partııasynyń kezekten tys IX sezi ótti. Onda «Otan» RSP-ǵa «Asar» partııasynyń qosylýy týraly sheshim qabyldandy. Osy jyldyń 22 jeltoqsanynda ótken partııanyń kezekten tys X sezinde «Otannyń» Azamattyq jáne Agrarlyq partııalarmen birikkeni jarııalandy. Bul sezde basym daýyspen Qazaqstannyń jetekshi saıası kúshiniń ataýyn «Nur Otan» Halyqtyq-demokratııalyq partııasy dep ózgertý týraly sheshim qabyldanǵan edi.

Esterińizge sala keteıik, 2008 jyldyń 17 qańtarynda Memleket basshysy Nursultan Nazarbaevtyń tóraǵalyǵymen «Nur Otan» HDP Saıası keńesiniń keńeıtilgen otyrysy ótti. Onda Partııanyń halyqtyq tuǵyrnamasyn júzege asyratyn baǵdarlama qabyldandy.

2008 jyldyń 15 mamyrynda «Jas Otan» Jastar qanatynyń І sezi uıymdastyryldy.

Al 2013 jyly 18 qazanda «Nur Otan» Halyqtyq-demokratııalyq partııasynyń ataýy «Nur Otan» partııasy bolyp ózgertildi. Dál osy kúni «Nurly bolashaq jolynda» atty partııanyń jańa Doktrınasy qabyldandy.

«Halyq kózdegini ǵana emes, kóńildegini de kóredi. «Nur Otan» naqty nátıjeniń, ilkimdi istiń partııasy atanyp, eldiń kóńilinen shyǵa bildi. «Eliń qýatty bolsa, baǵyń turaqty bolady» deıdi halqymyz. Kúnimizdi shýaqty ete túsý úshin elimizdi qýatty etý barlyǵymyzdyń ortaq paryzymyz. Elimizdi álemniń eń qýatty 30 eliniń qataryna qosý - aldymyzdaǵy úlken, uly maqsat. Bul «Nur Otannyń» bolashaqqa jol silteıtin temirqazyǵy bolýǵa tıis. Búgingi sezde qabyldanatyn «Nur Otannyń» jańa saıası doktrınasy da osyny kózdeıdi. Biz qoǵamymyzdyń erekshelikterin artyqshylyqqa aınaldyra bildik. Áralýandyǵymyz - baılyǵymyzǵa, birligimiz - tabysymyzǵa aınaldy. Osyny ult zııalylary únemi este ustap, jastarǵa árdaıym yntymaqtyń úlgisin kórsetkeni jón. Doktrınada memlekettik tildiń el birliginiń faktory retinde atalǵany da óte mańyzdy. Bul máselege asa den qoıatyn kez keldi. Qazaq tilin bilý azamattyq paryzdy ǵana emes, ultqa degen qurmetti de bildiredi. Otan otbasyndaǵy ónegeli tárbıeden bastaý alady. Osyny árbir azamat esinde ustaýy tıis», - dep atap ótti Elbasy «Nur Otan» partııasynyń XV sezinde.

Aıta keteıik, QR Parlament Májilisiniń saılaýy qarsańynda 2016 jyly 29 qańtarda partııanyń kezekten tys XVII sezi ótti. Onda «Nur Otan» partııasynyń «Birlik. Turaqtylyq. Jasampazdyq» atty saılaýaldy baǵdarlamasy bekitildi.