«Nur Otanda» Talǵat Ermegııaevti partııadan shyǵarý máselesi talqylanýda

ASTANA. QazAqparat - Sybaılas jemqorlyq qylmysyn jasady degen aıyp taǵylyp otyrǵan «Astana EKSPO-2017» ulttyq kompanııasynyń burynǵy basqarma tóraǵasy Talǵat Ermegııaev ázirge «Nur Otan» partııasy qatarynan shyǵarylǵan joq. Bul týraly búgin «Nur Otan» partııasy Astana qalalyq fılıaly tóraǵasynyń orynbasary Sapar Ahmetov jýrnalısterge bergen suhbatynda aıtty.

«Bul másele qazir T.Ermegııaev tirkelgen bizdiń «Birlik» aýmaqtyq fılıalynda talqylanyp jatyr. Onda jemqorlyqqa qarsy qoǵamdyq keńesiniń otyrysynan keıin sheshim shyǵarylady. Biz bul týraly qosymsha habarlaıtyn bolamyz», - dep atap ótti ol.

Aıta keteıik, 11 maýsymda Memleket basshysy Nursultan Nazarbaevtyń Jarlyǵymen Talǵat Ermegııaev «Astana EKSPO-2017» ulttyq kompanııasynyń basqarma tóraǵasy qyzmetinen bosatylǵan bolatyn.

12 maýsymda ony «úıqamaqqa» alý týraly sot úkimi shyqty. Kúdiktige QR QK 176-baby (senip tapsyrylǵan bireýdiń múlkin ıemdený nemese ysyraptaý) boıynsha aıyp taǵylǵan.