«Nur Otan» jańadan qurylǵan keńestiń alǵashqy otyrysyn ótkizdi
Májilis kezinde qoǵamdyq uıymdardyń ókilderi óz jobalaryn tanystyryp, el ishindegi ózekti máselelerdi sheshý joldaryn usyndy. Partııa Tóraǵasynyń birinshi orynbasary Máýlen Áshimbaevtyń aıtýynsha, jańadan qurylǵan keńestiń negizgi maqsaty - osy saladaǵy jumysty úlestirip, naqty jobalardy anyqtaý.
«Biz partııa janynan úkimettik emes uıymdarmen ózara is-qımyl jónindegi keńesti quryp otyrmyz. Bul - jańa qurylym. Búgin biz atalǵan keńestiń jumys tártibin talqylaý úshin jınalyp otyrmyz. Keńeske kim kiredi? Olar qalaı áreket jasaıdy? Sonyń bárin pysyqtaýymyz qajet. Jańa keńes naqty jobalardy, naqty bastamalardy talqylaıtyn alańǵa aınalýy tıis. Barlyq jumys ashyq ári ádil júrgiziledi. Soǵan ýáde etemiz», - dedi M.Áshimbaev búgingi keńes otyrysynda.
Keńeste «Nur Otan» partııasy men QR Din isteri jáne azamattyq qoǵam mınıstrligi ózara yntymaqtastyq jónindegi jol kartasyn bekitti. Al mınıstr Darxan Káletaev úkimettik emes uıymdardy óz alańyna shaqyrýdy umytpady.
«Bıyl biz VIII Azamattyq forýmdy ótkizemiz. Atalǵan shara jańa formatta uıymdastyrylady. Oǵan Memleket basshysy da qatysady. Qarasha aıyna deıin ýaqyt bar. Dál sol forýmda biz atqarylǵan jumysty pysyqtap, aldaǵy josparymyzdy jan-jaqty talqylaı alamyz. Sosyn 21-22 maýsym kúnderi Almaty oblysynda úshjaqty áriptestikke arnalǵan «Asar» atty respýblıkalyq forýmdy ótkizemiz. Sol jerde barlyq máselelerdi aldyn ala talqylap alýǵa bolady. Barlyq úkimettik emes uıymdardy osy sharaǵa shaqyramyn», - dedi D.Káletaev.
Aıta keteıik, keńes otyrysy kezinde «Nur Otan» partııasy Tóraǵasynyń birinshi orynbasary Máýlen Áshimbaev partııanyń negizgi mindetine toqtaldy.
Al QR Din isteri jáne azamattyq qoǵam mınıstri Darxan Káletaev qoǵamdyq uıymdardy qaıta tirkeýden ótkizýdi usyndy.