«Nur Otan»: Jańa Úkimettiń basty mindeti - júıeli jumys ornatý

ASTANA. QazAqparat - «Nur Otan» partııasy janyndaǵy Strategııalyq zertteýler ınstıtýty dırektorynyń orynbasary ıÝlııa Kýchınskaıa jańa Úkimet aldyndaǵy sheshimin tabýy tıis basty mindetterdi atady.

Instıtýt ókiliniń aıtýynsha, jańa Úkimettiń basty mindeti - júıeli jumys ornatý.

«Eger atqarýshy bıliktiń qyzmetine tutas taldaý jasasaq, onda árbir mınıstrliktiń tek óz múddesi úshin ǵana jumys isteıtinin kóremiz. Bul jerde júıeli jumys isteý, máseleniń júıeli túsinigin qalyptastyrý qalys qalǵan», - dedi ıÝlııa Kýchınskaıa «Nur Otan» partııasy seziniń qarsańyndaǵy paneldik sessııada jýrnalısterge bergen suhbatynda.

Onyń aıtýynsha, vedomstvolar arasynda tıisti deńgeıde baılanys joq. ıAǵnı, mınıstrlik qyzmetkerleri óz áriptesteriniń jumysyndaǵy ózgeristerdi seze bermeıdi.

«Máselen, bir-birimen tyǵyz baılanysty bolǵanymen, Bilim mınıstrligindegi jańalyqtan Eńbek jáne áleýmettik qorǵaý mınıstrligi múldem habarsyz qalyp jatady. Áleýmettik qıyn otbasyndaǵy balalardy qoldaý eńbek mınıstrliginiń de, bilim mınıstrliginiń de jumysy. Eki mınıstrlik te sol balamen, sol ata-analarmen jumys isteıdi, alaıda munda júıelilik joq, ol qalyptaspaǵan. Meniń oıymsha, eń birinshi kezekte osy baǵytta jumys isteý kerek», - dedi sarapshy.

Budan bólek, ıÝlııa Kýchınskaıa erteń «Nur Otan» partııasynyń kezekten tys sezinde partııa baǵdarlamasy jarııalanatynyn eske sala kele, onda aldaǵy mejelerge jetý úshin naqty maqsat, mindetter belgilenetinin atap ótti.

«Aldaǵy ýaqytta Úkimetpen, depýtattarmen birlese otyryp júktelgen mindetterdiń barlyǵyn tolyqqandy júzege asyrýǵa umtylýymyz kerek. Bul úshin qajetti mehanızmderdi qamtamasyz etýge tıispiz», dedi ol.