«Nur Otan»: Jambyl oblysynda praımerızge 28 kópbalaly ana qatysty

TARAZ. QazAqparat –Jambyl oblysynyń ákimi Berdibek Saparbaev «Nur Otan» praımerızinde onlaın rejıminde óz tańdaýyn jasady, dep habarlaıdy QazAqparat tilshisi.

Búgin praımerızge qatysýshylarǵa daýys berýdiń úshinshi kúni. «Nur Otan» partııasy Jambyl oblystyq fılıalynyń tóraǵasy, oblys ákimi Berdibek Saparbaev Taraz qalasynyń N3 ýchaskesinde bolyp, onlaın rejıminde daýys berdi.

Jalpy, oblys boıynsha praımerızge 768 úmitker qatysýda. Onyń 269-y – áıelder, 222-si – 35 jasqa deıingi jastar, 28-i – kópbalaly analar, 8-i – múmkindigi shekteýli azamattar. Aıta ketý kerek, kandıdattardyń basym bóligi, ıaǵnı 657 adam ózin-ózi usynǵan. Osy ýaqytqa deıin olardyń qatysýymen shamamen 2800 is-shara jáne 176 qoǵamdyq pikirsaıys ótkizilgen.

Qazirgi tańda jambyldyqtar úmitkerlerge daýys berýde belsendilik tanytýda. Tańerteńgi saǵat 10:00-ge deıin ýchaskelershe shamamen 42 500 adam keledi dep kútilse, resmı málimetterge sáıkes, osy ýaqytqa deıin 31 855 azamat óz tańdaýyn jasaǵan. 4,5 myńnan astam jambyldyqtar dástúrli túrde daýys berýdi tańdady.