«Nur Otan» respýblıkalyq saılaýaldy shtaby Pavlodar oblysynda júr

PAVLODAR. QazAqparat - «Nur Otan» partııasynyń respýblıkalyq saılaýaldy shtaby Pavlodar oblysyna keldi, dep habarlaıdy QazAqparat uıymnyń baspasóz qyzmetine silteme jasap.

Partııanyń saılaýaldy kún tártibi óńirdegi iri kásiporyndardyń biri «Qazaqstan Alıýmınııi» jumysshylarymen kezdesýde talqylandy.

Ekologııany jaqsartý maqsatynda qatty turmystyq qaldyqtar polıgondaryn salý jáne jyl saıyn ortasha alǵanda zııandy shyǵaryndylardy 3 myń tonnaǵa tómendete otyryp, kásiporyndardy jańǵyrtý josparlanýda.

Budan keıin muǵalimdermen kezdesýde saılaýaldy shtab músheleri bilim salasyn damytýdyń negizgi baǵyttaryn talqylady.

Osy kúni partııa ókilderi Novochernoıarka aýylynyń turǵyndarymen kezdesti. Bir jyl buryn aýyldaǵy 16 kópqabatty úıde ortalyqtandyrylǵan jylýdyń bolmaýy máselesi sheshimin tappaı turǵan bolatyn.

Osynaý uzaqqa sozylǵan jylytý qazandyǵyn salý máselesi partııalyq baqylaýǵa alynǵannan keıin bıyl aýyldaǵy 800 úı ǵana emes, sonymen birge mektep, aýrýhana jáne basqa da áleýmettik nysandar jylýmen qamtamasyz etildi.

Turǵyndardyń aıtýynsha, Chernoıarsk aýyldyq okrýgindegi túıtkildi máseleniń biri – aýyl ishindegi joldardyń sapasy. Osyny eskere otyryp «Nur Otan» partııasy aýdandyq saılaýaldy baǵdarlamaǵa 19 aýyldaǵy, onyń ishinde Novochernoıarkadaǵy joldarǵa jóndeý júrgizýdi engizdi.