«Nur Otan» praımerızine aýyl turǵyndary tarapyna qyzyǵýshylyq joǵary boldy - Edil Ospan
«17 tamyz ben 7 qazan aralyǵynda elimizdiń tarıhynda alǵash ret jalpyulttyq maqsatty qamtyǵan «Nur Otan» partııasynyń praımerızi ótti. «Nur Ota» praımerızi ótken jyly Elbasy - partııa Tóraǵasy Nursultan Nazarbaev jarııalaǵan «Senim. Dıalog. Bolashaqqa nyq qadam. Saıası uıymdy qaıta jandandyrý« baǵdarlamasynyń mańyzdy faktisi boldy. Elbasy - partııa Tóraǵasy «Nur Otan» qatarynan qoǵamdyq joǵary qoldaýǵa ıe jańa kóshbasshylardy iriktep alý tapsyrmasyn júktedi. Partııanyń ortalyq apparaty jáne óńirlik qurylymdary úlken jumys kólemin sátti júzege asyryp, partııa basshylyǵy júktegen mindetterdi oryndady. 1-4 qazanda daýys berýge partııalastardyń jalpy sanynyń 84 paıyzy qatysty», - dedi «Nur Otan» partııasy praımerıziniń qorytyndysyna arnalǵan dóńgelek ústel barysynda.
Osy rette ol praımerız qorytyndysyna jasalǵan saraptamaǵa oraı partııaishilik irikteý nátıjelerine toqtaldy.
«Bizdiń áleýmettik zertteýlerimizge sáıkes, halyqtyń úshten biri sybaılas jemqorlyqpen kúresetin, halyqpen dıalog júrgizetin, únemi esep berip otyratyn, qarapaıym adamdardyń bastamalaryn júzege asyratyn partııany qoldaýǵa daıyn. Partııa praımerızi qoǵam tarapynan zor qyzyǵýshylyq týdyrdy. Praımerız bastalardan 1 apta buryn alynǵan saýalnamaǵa qatysqandardyń 45,6 paıyzy partııaishilik saılaý týraly estigenin, 47,5 paıyz qoldaý bildirgenderin jáne 42 paıyzy qatysýǵa nıetti ekendigin aıtty. Praımerızge eń úlken qyzyǵýshylyq pen qatysýǵa degen nıet aýyldyq eldi mekenderdiń jáne Almaty men Shymkent qalalarynyń turǵyndary arasynda baıqaldy», - dedi Edil Ospan.
Onyń aıtýynsha, praımerız qatysýshylary 120 myńnan astam is-shara, 60 myńnan astam kezdesýler men pikirtalas ótkizdi.
Praızerızge qatysýǵa 11 249 adam ótinim berip, 10 073 kandıdat tirkeldi. Olardyń 20 paıyzdan astamy jańa adamdar. Elimiz boıynsha orta eseppen bir orynǵa 4 kandıdat talasty. Bul rette bir orynǵa Nur-Sultan qalasynda 15, Almaty men Shymkent qalalarynda 7 kandıdattan boldy. Kandıdattardyń 36,7 paıyzy áıelderdi, 29 paıyzy 35 jasqa deıingi jastardy qurady.