«Nur Otan»: praımerızi: ShQO-da kandıdattar qandaı máseleler kóterdi

ÓSKEMEN. QazAqparat – Shyǵys Qazaqstan oblysynda «Nur Otan» partııasy praımerıziniń ashyq pikirsaıysyna 50-den astam úmitker qatysyp, qoǵamnyń ár salasyndaǵy ózekti máselelerdi kóterdi, dep habarlaıdy QazAqparat tilshisi.

«Nur Otan» partııasy Shyǵys Qazaqstan oblystyq fııaly baspasóz qyzmetiniń málimetinshe, oblystyń aýdan ortalyqtarynda ótken pikirsaıysta praımerızge qatysýshylar óz baǵdarlamalarynda eldimekenderdegi túıtkildi máselelerdi sóz etti.

«Aýyldy jerlerde turatyn halyqty sapaly aýyzsýmen tolyqtaı qamtamasyz etý, jol máselesi, bilim salasyndaǵy problemalar men medıtsınadaǵy ózekti suraqtardy óz baǵdarlamamnyń basym baǵyttaryna jatqyzamyn», - dedi úmitkerlerdiń biri Darhan Abýlhanov.

Pikirsaıystyń birinshi kezeńinde qatysýshylar óz baǵdarlamalaryn tanystyrsa, ekinshi kezeńinde suraqtarǵa jaýap beredi. Debatty onlaın kórip otyrǵan dúıim jurt spıkerlerge óz saýaldaryn áleýmettik jeli arqyly qoıýǵa múmkindik aldy.

«Elimiz egemendik alǵan kúnnen bastap ózge eldegi qandastarymyz Elbasymyz Nursultan Nazarbaevtyń bastamasymen «Nurly kósh» baǵdarlamasy arqyly atamekenge oralýǵa múmkindik aldy. Búgingi kúnge deıin mıllıondaǵan baýyrlarymyz Otanyna kelip tabysty qyzmet etýde. Memleket tarapynan kórsetilip jatqan qoldaýlar da bar. Dese de qandastarǵa qatysty máseleler az emes, atap aıtqanda azamattyq alýdaǵy túrli qıyndyqtar, baspanamen qamtý, ortaǵa beıimdeý jumystaryn júrgizý syndy máseleler sheshýdi qajet etedi», - dedi praımerızge qatysýshy Áskerhan Hýanbaı.

Óskemen qalasynda ótken pikirsaıysqa «Nur Otan» partııasy Shyǵys Qazaqstan oblystyq fılıaly tóraǵasynyń birinshi orynbasary Oleg Chýgýnkov qatysyp, úmitkerlerge sáttilik tiledi.

Aıta keteıik, ótkir máseleler talqylanǵan ashyq pikirsaıystar 30 qyrkúıekke deıin jalǵasady.