«Nur Otan» praımerızi: Almatyda úmitkerlerdiń 25% - jastar

ALMATY. QazAqparat – «Nur Otan partııasy» Almaty qalalyq fılıaly tóraǵasynyń birinshi orynbasary Stanıslav Kankýrov onlaın-brıfıng barysynda praımerızdiń ótý barysy týraly aıtyp berdi, dep habarlaıdy QazAqparat tilshisi.

«Saıası ózgerister men jańa kóshbasshylar úshin ýaqyt keldi. Qazaqstandyq qoǵamda jańa tulǵalar men ıdeıalarǵa suranys paıda boldy. Sondyqtan bul joly biz jastar men áıelderdi óz qatarymyzǵa tartýǵa erekshe kóńil bólemiz. Tipti, praımerızdi ótkizý erejesinde tizimde áıelderdiń keminde 30% jáne 35 jasqa deıingi jastardyń keminde 20% bolýy tıis dep jazylǵan. Osylaısha, praımerız eń laıyqty kandıdattardy tańdaýǵa kómektesedi. Olar óz kezeginde el tarıhynda óz izin qaldyrady dep oılaımyn»,– dedi Stanıslav Kankýrov.

Onyń aıtýynsha,7 qyrkúıekten 3 qazanǵa deıin kandıdattar úgit jumystaryn júrgizedi. Osy kezeńde 14-30 qyrkúıek aralyǵynda karantınge baılanysty barlyq qaýipsizdik sharalaryn saqtaı otyryp, jarııa pikirsaıystar ótkizý josparlanýda.

«Elektrondy daýys berý 1-3 qazan aralyǵynda jańa aqparattyq júıe arqyly onlaın rejıminde ótedi. Ol «Praımerız» dep atalady.

Almatyda partııa músheleriniń sany 60 myńnan asady – bul qala saılaýshylarynyń 7% jýyǵy»,– dedi ol.

Búgingi kúni «Nur Otan» praımerızine qatysýǵa 96 almatylyq nıet bildirdi.

Olardyń 30% áıelder, 25% jastar, sondaı-aq erekshe qajettilikteri bar adamdar, kópbalaly analar, eriktiler jáne basqalar bar.