«Nur Otan» partııasynyń janynan 9 jańa qoǵamdyq keńes qurylady
«Nur Otan» partııasynyń Lıderi, Elbasy N.Á.Nazarbaevtyń partııanyń «Ózgerister joly: Ár azamatqa laıyqty ómir!» saılaýaldy baǵdarlamasyn, sondaı-aq, oblystar, qalalar men aýdandarǵa arnalǵan 216 óńirlik saılaýaldy baǵdarlamanyń júzege asyrylýyn júıeli baqylaýdy qamtamasyz etý jónindegi tapsyrmasy aıasynda partııa janynda 14 qoǵamdyq keńes jumys isteıtin bolady. Árbir keńes partııa saılaýaldy baǵdarlamasynyń naqty bir baǵytymen aınalysady.
Jumys istep turǵandary:
- Partııalyq baqylaý komıteti;
- Sybaılas jemqorlyqqa qarsy keńes;
- Mádenıet pen ónerdi damytý máseleleri jónindegi «Mıras» keńesi;
- Quqyqtyq keńes;
- Otbasy, áıelder jáne balalardyń quqyǵyn qorǵaý jónindegi keńes.
Jańadan qurylatyn keńester:
- Ekonomıkany damytý jáne kásipkerlikti qoldaý jónindegi keńes;
- Bilim men ǵylymdy damytý jónindegi keńes;
- Ult densaýlyǵy máseleleri jónindegi keńes;
-Jumyspen qamtýdy jáne halyqtyń áleýmettik álsiz toptaryn qoldaý jónindegi keńes;
- Óńirlik damý jónindegi keńes;
- Azamattyq qoǵam men memlekettik basqarýdy damytý jónindegi keńes;
- Jastardy qoldaý jónindegi keńes;
- Ekologııalyq keńes;
- Agrarlyq sektordy damytý jónindegi keńes.
Qoǵamdyq keńesterdiń jańa qurylymyn, sondaı-aq tıisti basshylardyń kandıdatýralaryn partııa Saıası keńesiniń Bıýrosy bekitedi. Ortalyq jáne óńirlik deńgeıdegi keńesterdiń quramyna partııalyq tizimderden 2 myńǵa jýyq rezervshi, sarapshylar men azamattyq qoǵam ókilderi tartylady dep josparlanýda.
Eske sala keteıik, saılaýaldy ýádelerdi oryndaý jónindegi Respýblıkalyq Jol kartasy Premer-Mınıstr men Úkimet músheleriniń qatysýymen Májilistegi fraktsııa otyrysynda talqylanǵan bolatyn. Óńirlerde saılaýaldy baǵdarlamalardy oryndaý boıynsha 216 jol kartasy jarııa talqylandy jáne bekitildi.
Partııanyń Ortalyq apparaty jumysty jalpy úılestirýdi júzege asyrady. Al Úkimet pen ákimder janyndaǵy respýblıkalyq jáne óńirlik shtabtar tıisinshe respýblıkalyq deńgeıde – 1,7 myńnan astam jáne óńirlik deńgeıde – 81 myńnan astam ındıkatordy oryndaýǵa alady. Bıyldyń ózinde ındıkatorlardyń 24%-in oryndaý josparlanyp otyr.