Nur Otan partııasynyń músheleri múgedekter múddesin qorǵaýda

QARAǴANDY. QazAqparat - Partııa músheleri qaraǵandylyq jumys berýshilerge múgedekterdiń jumysqa ornalasý quqyǵy týraly áńgimeledi. Bul kúnderi oblystyń barlyq qalalary men aýdandarynda «Kedergisiz keleshek» partııalyq jobasy aıasynda kásiporyndarda kezdesýler ótip jatyr, dep habarlaıdy QazAqparat tilshisi.

Partııalyqtar jumys berýshilerge múgedekterdiń eńbek quqyqtary, múmkindigi shekteýli adamdarǵa arnalǵan kvotalar týraly aıtyp berdi. Sonymen qatar, olar kásipkerlerdi áleýmettik jaýapkershilikke shaqyrdy. Ómirdiń qıyndyǵyna tap bolǵan adamdarǵa der kezinde qol ushyn berip, kómek kórsetýdiń mańyzy jaıly áńgimeledi.

Nur Otan 2019-2021 jyldarǵa arnalǵan «Kedergisiz keleshek» jobasynyń jol kartasyn ázirledi. Qujatta ınklıýzıvti bilim berýdi damytý, múgedektigi jáne erekshe qajettilikteri bar adamdardy jumyspen qamtý, kedergisiz orta qurýǵa járdemdesý boıynsha sharalar qarastyrylǵan.

Memleket qoldaýymen múmkindigi shekteýli adamdarǵa arnalǵan sheberhanalar men kásiptik oqytý ortalyqtary ashylady. Mysaly, Saran qalasynda estý qabileti nashar múgedekter jumyspen qamtamasyz etildi. Ol úshin bıýdjet qarajatyna qural-jabdyqtar satyp alyndy.

Aıta keteıik, elimizde múgedekterdi áleýmettik qorǵaý týraly zań 2005 jyly qabyldandy. Ol múgedekterdiń teń múmkindikterin, áleýmettik jáne eńbek quqyqtaryn qamtamasyz etýge baǵyttalǵan erejelerdi qamtıdy. Al, 2015 jyly Qazaqstan álemniń 130-dan astam elinde ratıfıkatsııalanǵan Múgedekterdiń quqyqtary týraly halyqaralyq konventsııaǵa qosyldy.