«Nur Otan» partııasynyń Astana qalalyq fılıaly esep berdi

ASTANA. QazAqparat - Búgin «Nur Otan» partııasy Astana qalalyq fılıaly (AQF) XXVII esep berý-saılaý konferentsııasyn ótkizdi. Jıyn barysynda fılıaldyń 2017-2018 jyldary atqarylǵan jumys nátıjesi jarııalandy, dep habarlaıdy QazAqparat.

«Elbasynyń ıgi bastalamalaryn is júzinde engizý, qabyldanǵan baǵdarlamalardy sońyna deıin tııanaqty oryndaý barlyǵymyzdyń mindetimiz. Osy rette «Nur Otan» partııasynyń jarǵysyna sáıkes, Astana qalalyq fılıalynyń kezekti 27-shi konferentsııasyna jınalyp otyrmyz. Konferentsııaǵa 150 degegat saılandy», - dedi partııanyń Astana qalalyq fılıalynyń tóraǵasy, qala ákimi Baqyt Sultanov.

Qazirgi tańda Astana qalalyq fılıaly qaramaǵynda 7 fılıal, 364 bastaýysh partııa uıymy bar. Sondaı-aq, óz qatarynda 45 myń múshesin quraıdy. Jyl basynan beri partııaǵa 5 000 adam múshe boldy.

«Partııa Tóraǵasynyń Birinshi orynbasary Máýlen Áshimbaev aıtqandaı, partııa tıimdi, zamanaýı jáne tehnologııalyq kezeńge saı bolý tıis. Partııany jańartý baǵytyn júzege asyrý úshin AQF naqty jumystardy atqardy, jańa jobalar men baǵdarlamalardy ázirledi»,-dedi «Nur Otan» partııasy AQF tóraǵasynyń birinshi orynbasary Baqyt Saparov.

2017-2018 jyldar aralyǵynda AQF kelesideı is-sharalardy júzege asyrdy: «Astana - rýhy myqty adamdar qalasy» sharasy, múgedek balalary bar ata-analardy qoldaýǵa arnalǵan respýblıkalyq konferentsııa, І-ІІ qalalyq spartakıada, múmkindigi shekteýli balalarǵa arnalǵan festıval, sondaı-aq alǵashqy áleýmettik kásipkerler forýmy ótkizildi. Forým aıasynda Áleýmettik kásipkerlikti qoldaý qory qurylyp, sonyń qoldaýymen aǵymdaǵy jyly 3 joba iske asyryldy.

Belgili bolǵandaı, «Rýhanı jańǵyrý» baǵdarlamasyn júzege asyrý baǵytynda 376 is-shara ótkizildi. Oǵan 80 myńǵa jýyq adam qatysty. 2017 jylmen salystyrǵanda bıyl partııanyń AQF janyndaǵy «Jas Otan» JQ qataryndaǵy jastardyń sany 19 paıyzǵa ósti. Búginde qaramaǵynda 25 000 adamdy qamtydy.

AQF janyndaǵy «Jas Otan» JQ tóraǵasynyń orynbasary Nurdaýlet Jandildaevtiń sózine qaraǵanda, qaladaǵy oqý oryndarynda jastar uıymdary bar.

«Kún saıyn túrli is-sharalardy ótkizýge atsalysyp jatamyz. Ardagerler men az qamtylǵan otbasydan shyqqan jastarǵa kómek kórsetemiz. Osy jyly «Jas Otan» JQ qoldaýynyń arqasynda birqatar jastar tegin oqýǵa tústi. Bolashaqta jastarǵa arnaıy qyzmet kórsetý ortalyǵyn ashýdy kózdep otyrmyz», - dedi N. Jandildaev.