«Nur Otan» partııasynan máslıhat saılaýyna qatysatyn úmitkerler belgili boldy - Aqmola

KÓKShETAÝ. QazAqparat - Aqmola oblysynda «Nur Otan»partııasynan oblystyq máslıhatyna kandıdattardyń tizimi bekitildi, dep habarlaıdy QazAqparat tilshisi «Nur Otan»partııasy Aqmola oblystyq fılıalynyń baspasóz qyzmetine silteme jasap.

Qazirgi qyzmet istep jatqan depýtattardyń jartysynan azy partııalyq tizimge engen. Tizim shamamen 70 paıyzǵa jańartyldy.

Óńir basshysy Ermek Marjyqpaev syndarly jumysty jalǵastyrýǵa shaqyrdy.

Osylaısha Aqmola oblystyq «Nur Otan» partııasy fılıalynyń partııa músheleri kezekten tys HHHІІІ konferentsııasynda oblystyq máslıhat depýtattaryn saılaý boıynsha partııalyq tizimdi bekitip, 58 kandıdattyń tizimin usyndy.

Tizimde kóptegen jańa esimder bar, bul fraktsııa quramyndaǵy eleýli ózgeristerdi bildiredi. Sabaqtastyq saqtala otyryp, bekitilgen partııalyq tizim boıynsha qazirgi depýtattardyń 31,2 paıyzy qaıta saılaýǵa barady.

Oblys ákimi, partııanyń oblystyq fılıalynyń tóraǵasy Ermek Marjyqpaev saılaýaldy baǵdarlama jobasy boıynsha aqmolalyqtardan 1300-ge jýyq usynystar men pikriler túskenin, olardyń 782-si eskerilip, sáıkesinshe aýmaqtyq jáne oblystyq saılaýaldy baǵdarlamalaryna engizilgenin atap ótti.

Konferentsııa barysynda delegattar Aqmola oblysynyń saılaýaldy baǵdarlamasyn qabyldady, jasyryn elektrondyq reıtıngtik daýys berý arqyly oblystyq máslıhat pen Májilis depýtattaryn saılaýǵa kandıdattardyń tizimin bekitti.

Oblystyq máslıhattaǵy partııalyq tizim ár túrli toptardan, ıaǵnı, onyń ishinde kópbalaly analar, erekshe qajettiligi bar adamdar, azamattyq sektordyń, otandastardyń ókildiginen qurylǵan.

Partııalyq tizimniń 29,3 paıyzy - shaǵyn jáne orta bıznestegi kásipkerlerdiń úlesinde bolsa, 25,9 paıyzyn - bilim salasynyń ókilderi, 13,8 paıyzyn - aýyl sharýashylyǵy jáne basqalary quraıdy.

Sondaı-aq, kvazımemlekettik sektor ókilderi - 8,6 paıyz, ónerkásip jáne densaýlyq saqtaý salasynyń árqaısysy 6,9 paıyz, memlekettik qyzmetkerler - 3,4 paıyz. Sol sııaqty úkimettik emes uıymdardyń, mádenıet jáne sport salasynyń, partııa músheleriniń árqaısysy – 1,7 paıyzdy quraıdy.

Jalpy, oblystyq máslıhattyń quramy shamamen 70 paıyzǵa jańarady.

– Praımerızdiń birinshi kezeńi boıynsha eń bedeldi úmitkerler, ár túrli qyzmet salalarynyń mamandary anyqtaldy. Olar mańyzdy basymdyqtarmen, azamattyq belsendiliktiń jańa múmkindikterimen naqty is-qımyl baǵdarlamasyn usynady jáne eń bastysy, azamattardyń shuǵyl áleýmettik máselelerin sheshýge, aımaq turǵyndarynyń ómir súrý sapasyn jaqsartý úshin jaýapkershilikti alýǵa birlesip jumys isteýge daıyn, – dep atap ótti óńir basshysy E.Marjyqpaev.