Nur Otan partııasyna qandaı ózgerister qajet – Sarapshy pikiri
Onyń aıtýynsha, erteńgi jıynda Nur Otan partııasynyń rebrendıngi týraly másele kóterilýi múmkin.
«Partııaǵa rebrendıng júrgiziletini anyq. Biraq oǵan birjaqty qaramaý mańyzdy. Kóptegen adamdar rebrendıngti tek ataý men logotıpti ózgertý dep túsinýi múmkin. Alaıda, bul protsess partııanyń qazirgi jumysyndaǵy tásilderdi qaıta qurýǵa baǵyttalady dep oılaımyn. Olar óz elektoratynyń saýaldaryna ún qatyp, azamattardyń quqyqtary men múddelerin, ásirese máslıhattardaǵy fraktsııalar arqyly is júzinde qorǵaýǵa da belsene kiriskenderi jón. Oblystyq jáne aýdandyq fılıaldardaǵy basshylyq quramdy jańartý qajet. Onda jańa kózqarasy bar, partııanyń adamdarmen qarym-qatynasyn qalpyna keltiretin jańa adamdardy ákelý kerek. Áıtpese, barlyq jańǵyrtý bosqa ketýi múmkin. Jergilikti jerlerde depýtattardy almastyrý jumysy júrýi múmkin. Oǵan Nur Otan partııalyq tizimindegi rezerv jetkilikti», - dedi Orazǵalı Selteev agenttik tilshisine bergen suhbatynda.
Sarapshynyń aıtýynsha, rebrendıng – partııanyń aldaǵy barlyq saılaý naýqandaryna daıyndyq protsesiniń bir bóligi bolýy múmkin.
«Partııa fılıaldaryn oblystardyń, qalalar men aýdan ákimderi basqarýyn toqtatý qajet dep oılaımyn. Muny partııanyń ózi qolǵa alýy kerek, áıtpese prezıdenttik reformalar men tapsyrmalardyń oryndalýyna naqty jáne sapaly partııalyq baqylaý jasaý qıyn bolady. Partııany ákimderden bólip-ajyratý mańyzdydep esepteımin», - dedi Orazǵalı Selteev.
Sonymen birge, saıasattanýshy Memleket basshysynyń eldegi shynaıy kóppartııalyqty damytýǵa jol ashý úshin partııadaǵy tóraǵalyqtan ketýi de múmkin ekenin aıtty.
«Bul Prezıdenttiń Joldaýy qarsańynda qısyndy da bolar edi, onda ol partııalyq jáne saılaý zańnamasyn lıberızatsııalaýǵa baılanysty saıası reformalardyń jańa paketin usynýy múmkin. Jańa sharalar ashyq básekelestik saıası ortany qalyptastyrýǵa, jańa saıası partııalardyń paıda bolýyna jaǵdaı týǵyzýy tıis. Prezıdent Nur Otan partııasynyń aldyna servıstik partııa bolý mindetin qoıdy. Kóbinese aımaqtardaǵy partııa jergilikti atqarýshy bıliktiń jetistikterin menshiktep alady. Bul durys emes. Partııa munymen aınalyspaýy kerek. Partııanyń basty baǵyty óz saılaýshylarynyń múddelerin bildirý jáne quqyqtaryn qorǵaý bolýy tıis», - deıdi O. Selteev.