«Nur Otan» partııasy men birqatar úkimettik emes uıymdar ózara kelisim jasasty

ANA. Qazannyń 27-si. QazAqparat /Jasulan Amanbaıuly/ - «Nur Otan» HDP Ortalyq apparatynda «Dınamo» deneshynyqtyrý sport qoǵamy, Qazaqstannyń Radıosport jáne radıoáýesqoı qaýymdastyǵy, áskerı-sporttyq klýbtar qaýymdastyǵy jáne partııa ózara yntymaqtastyq týraly kelisimge qol qoıdy.

Kelisim arqyly taraptar jastarǵa patrıottyq tárbıe berý isin odan ári birlesip damytýǵa, salaýatty ómir saltyna buqaralyq sıpat berýge, sonymen qatar ǵarysh salasyndaǵy áleýetti, ǵylymı-tehnıkalyq jáne tehnologııalyq jetistikterdi nasıhattaý baǵytynda jemisti eńbek etýge ýaǵdalastyq jasasty.

Partııada málim etkenindeı, memorandýmnyń basty tujyrymdamasy - túrli aktsııalardy ótkizýge baǵyttalǵan. Sonyń ishinde áskerı-patrıottyq jáne sporttyq qyzmet salasyndaǵy jobalar, sport jáne jastar saıasaty zańnamasyn jetildirý boıynsha áriptestik júrgizý, balalar jáne joǵary deńgeıli sportty, sonymen qatar buqaralyq sporttyń qanat jaıýyna járdemdesý, áleýeti joǵary ǵylymı-tehnıkalyq jetistikterdi halyq arasynda nasıhattaý.

Uıymdastyrýshylar atalǵan kelisimniń negizinde Qazaqstannyń álemdik sporttaǵy halyqaralyq bedelin qalyptastyrýǵa ǵana emes, sonymen birge jastardyń patrıottyq tárbıesinde úlken jemis kóretinderine senimdilik bildirdi.

«Nur Otan» HDP Hatshysy Qaırat Satybaldyulynyń atap kórsetkenindeı, atalǵan qujatqa qol qoıý QR Prezıdenti N.Nazarbaevtiń halyqqa Joldaýynda aıtylǵan tapsyrmalaryn oryndaý aıasyndaǵy naqty is-qımyl bolyp tabylady.

«Birlesken is-qımyldardyń mańyzdylyǵy men der kezinde jasalǵandyǵyn eskere otyryp, biz elimizdegi áskerı-patrıottyq, tehnologııalyq jáne ınnovatsııalyq salalardaǵy jobalardy damytýǵa jáne qoldaýǵa kúsh salamyz», - dedi Q. Satybaldyuly.