Nur Otan partııasy Almatydaǵy medqyzmetkerlerdiń ýaqytsha turyp jatqan jerlerin baqylaýǵa aldy
Jýyrda Almaty qalasy ákiminiń orynbasary Erjan Babaqumarov bastaǵan, quramynda partııalyq baqylaý komıssııalarynyń tóraǵalary, aýdan ákimderiniń orynbasarlary, aýdandyq SES jáne AMB ókilderi, qoǵamdyq uıymdardyń volonterleri bar jumys toby medıtsına qyzmetkerleriniń turyp jatqan oryndaryn tekserip, epıdemıologııalyq normalardy saqtaý boıynsha birqatar tapsyrmalar bergen bolatyn.
Búgin Medeý aýdanynda partbaqylaýdyń monıtorıng toby ekinshi ret Abaı atyndaǵy Qazaq ulttyq pedagogıkalyq ýnıversıtetiniń №3 jataqhanasy men «Mıka sıtı otel» qonaq úıin tekserdi. Bul jerde 124 medıtsına qyzmetkeri turady. Partııalyq komıssııa tarapynan birinshi monıtorıng kezinde anyqtalǵan kemshilikterdiń joıylýy tekserildi.
«Iá, shynymen de monıtorıng tobymen medıtsına qyzmetkerleri turatyn nysandardy qaıta baqylaý kezinde epıdemıologııalyq talaptardyń saqtalmaǵandyǵy jóninde faktiler anyqtalǵan bolatyn. Olardy joıý boıynsha kúndelikti jumys atqaryp jatyrmyz. Sondaı-aq, qaıta baqylaý kezinde medıtsına qyzmetkerleri tarapynan birqatar tilek-usynystar aıtylyp, suraqtar qoıylǵan bolatyn. Olar partııanyń qalalyq fılıalynyń tóraǵasy, qala ákimine jetkizilip, baqylaýǵa alyndy», - dep atap ótti Nur Otan partııasy Medeý aýdandyq fılıalynyń partııalyq baqylaý komıssııasynyń tóraǵasy Ámirjan Nábıev.
Meıirbıke Baqyt Ábildaevanyń aıtýynsha, ótken aptada komıssııa kelip olardyń tamaqtanýy men qorǵanys quraldarymen qamtylýyn teksergen.
« Nur Otan partııasy demeýshilermen birigip, sanıtaızerler men jemis-jıdekter ákelip berdi. Áriptesterim «Birgemiz» qorynan 50 myń teńge materıaldyq kómek alyp jatyr. Elbasymyz ben Prezıdentimizge medıtsına qyzmetkerleriniń qamyn oılap, kómektesip jatqandaryna alǵysymyzdy bildiremiz», - dedi Baqyt Ábildaeva.
Aldaǵy ýaqytta, tekserý qorytyndylary boıynsha monıtorıng toptary daıyndaǵan anyqtamalar tolyq taldanyp, tıisti sheshimder qabyldanatyn bolady.