«Nur Otan» partııasy 1,5 myńnan astam almatylyq otbasyǵa kómek kórsetti

ALMATY. QazAqparat – «Nur Otan» partııasy «Mektepke jol» respýblıkalyq aktsııasy aıasynda 1,5 myńnan astam almatylyq otbasyǵa kómek kórsetti, dep habarlaıdy QazAqparat tilshisi.

Almatyda partııa músheleri «Mektepke jol» qaıyrymdylyq aktsııasy aıasynda áleýmettik osal sanattaǵy balalarǵa jáne kópbalaly otbasylarǵa kómek kórsetýde. Bir jarym myńnan astam almatylyq otbasyǵa planshetter, keńse taýarlary bar oqýshy sómkesi men veb-kameralar berildi.

«Meniń tórt balam bar, kishi ulym bıyl nólinshi synypqa barady. Barlyǵyn keńse taýarlaryn satyp alý úshin birshama aqsha ketetin edi. Sondyqtan partııalyqtardyń kómegi maǵan úlken qoldaý boldy. Olar balalaryma keńse jabdyqtarymen qatar, planshet syılady. «Nur Otan» partııasyna qıyndyqta jalǵyz qaldyrmaı, balalardy mektepke jınaýǵa kómektesken úshin úlken alǵysymdy bildirgim keledi», - deıdi kópbalaly ana Janar Naızaǵaraeva.