«Nur Otan» óz jumysynda ǵylymı negizdelgen usynymdarǵa súıenedi - sarapshy

ASTANA. QazAqparat - «Nur Otan» partııasy óz saıasatyn iske asyrýda, sheshimderin ázirleýde jáne strategııalyq mindetterin aıqyndaǵanda taldaýlar men ǵylymı negizdelgen usynymdarǵa súıenedi. Mundaı pikirdi QR Prezıdenti janyndaǵy Qazaqstan strategııalyq zertteýler ınstıtýty Aqparattyq-taldaý jumysy bóliminiń basshysy, áleýmettaný ǵylymdarynyń kandıdaty Asara Muqanova bildirdi, dep habarlaıdy QazAqparat.

«Nur Otan» partııasynyń kún tártibi men qyzmeti partııa kóshbasshysy Nursultan Ábishuly Nazarbaev qoıǵan mindetterge baılanysty únemi ózgerip otyrady. «Nur Otan» partııanyń barlyq múshelerin jumyldyra otyryp, Memleket basshysynyń kóptegen ınstıtýtsıonaldyq reforma jobalaryn ázirleýge jáne júzege asyrýǵa belsene qatysady. Barlyq reformalardy tabysty júzege asyrý faktorlarynyń biri - normatıvtik-quqyqtyq jáne zańnamalyq bazany jetildirý bolyp otyr. Bes ınstıtýtsıonaldyq reformanyń árqaısysy boıynsha «Nur Otan» birqatar zańnamalyq aktilerdiń qabyldanýy týraly bastama kóterdi», - dedi Asara Muqanova.

Osylaısha, partııa «Barshaǵa arnalǵan zamanaýı memleket» birinshi reformany júzege asyrý aıasynda memlekettik jáne ókiletti organdardyń qyzmetine jastardyń qatysýyn keńeıtýdi, memlekettik qyzmetshilerdiń tabysy men múlkin deklaratsııalaý máselelerin retteýdi kózdeıtin zańnamalyq usynystar ázirledi.

«Turaqty ekonomıka» baǵytynda «Nur Otan» bıznestegi memlekettiń qatysýyn zań júzinde qysqartýmen qamtamasyz etetin jańa Іskerlik kodeksti qabyldaý bastamasyn kóterdi. «Ashyq jáne esep beretin memleket» reformasynda partııa «Aqparatqa qol jetkizý týraly», «Memlekettik satyp alýlar týraly», «Qoǵamdyq baqylaý týraly» zańdaryna zańnamalyq normalar paketin ázirledi», - dep tolyqtyrdy ol.

Sarapshy jaǵdaıdy júıeli jáne jan-jaqty taldaýsyz, memlekettik baǵdarlamalardy monıtorıngileý men baǵalaýsyz jáne qoǵamdyq qoldaýsyz reformalardy tabysty júzege asyrýdyń múmkin emestigin jetkizdi.

«Sondyqtan, «Nur Otan» óz damýynyń jańa kezeńine enip, óz jumysynda saraptaýǵa basymdyq beredi. Búginde sheshimderdi ázirleýde, partııa saıasatyn óńirlerde iske asyrýda jáne strategııalyq mindetterdi aıqyndaǵanda partııa óziniń taldamalyq qurylymdarynyń baısaldy taldaýyna jáne ǵylymı negizdelgen usynymdaryna súıenedi. Óńirler men tutas eldegi jaǵdaıdy jan-jaqty jáne júıeli túrde taldaý «Nur Otanǵa» jańa damý tendentsııalaryn qalyptastyrýǵa jáne ózekti problemalardyń utymdy sheshimderin usynýǵa múmkindik beredi», - deıdi Asara Muqanova.