Nur Otan óz depýtattary týraly qyzyqty derektermen bólisti

NUR-SULTAN. QazAqparat – Qysta ótken saılaýdyń qorytyndysy boıynsha barlyq deńgeıdegi máslıhattardaǵy «Nur Otan» fraktsııalarynyń quramy 65%-ǵa jańardy, dep habarlaıdy QazAqparat atalmysh saıası uıymnyń baspasóz qyzmetine silteme jasap.

Qysta ótken saılaýdyń qorytyndysy boıynsha barlyq deńgeıdegi máslıhattardaǵy «Nur Otan» fraktsııalarynyń quramy 65%-ǵa jańardy. Osyǵan baılanysty bıleýshi partııanyń baspasóz qyzmeti áleýmettik jelilerdegi resmı akkaýnttarynda qazaqstandyqtardy ózderiniń jańa depýtattarymen tanystyratyn aıdar ashty. Olardyń basym bóligi – kóp qıyndyq kórip, búginde qaıyrymdylyqpen, erekshe qajettilikteri bar azamattardy qoldaýmen belsendi aınalysyp júrgen, erik-jigeri myqty azamattar.

Solardyń biri – partııaishilik praımerızdiń nátıjesinde elordalyq máslıhattyń depýtaty bolǵan Ǵabıt Satmaǵambetov. Pavlodar oblysynyń balalar úıinde ósken ony keıinnen balasy joq otbasy asyrap alady. Bolashaq halyq qalaýlysy zańgerlik bilim alyp, advokat bolyp jumys isteıdi. Biraq ýaqyt óte kele ózin basqa salada synap kórmekke bel býyp, qurylys kompanııasyn qurady. Osylaısha, ol 2014 jyldan beri 1 mln sharshy metrden astam turǵyn úı saldy.

Qolǵa alǵan isi alǵa basyp, tasy órge domalaǵan Ǵabıt Satmaǵambetov taǵdyrdyń taýqymetine ushyrap, túrli qıyndyqtarǵa tap bolǵan jandarǵa qol ushyn sozý úshin qaıyrymdylyq qoryn qurdy. Onyń qory 2,5 myńnan astam qazaqstandyqqa kómek kórsetti. Erekshe qajettilikteri bar balalardy tárbıelep otyrǵan 200-den astam kópbalaly otbasyǵa páter berdi. Sondaı-aq, ol azyq-túlik sebetin taratatyn aktsııalardy turaqty túrde uıymdastyryp, qarttar úıi, sańyraýlar men múgedekter qoǵamyna qamqorlyq jasap, erekshe qajettilikteri bar balalar úshin jylyna 100 mln teńgeden astam somaǵa emdeý jáne ońaltý kýrstarynyń aqysyn tóleıdi. Ol Arys qalasyndaǵy zardap shekken turǵyndarǵa arnalǵan úılerdiń qurylysyna 50 mln teńgeden astam qarajat bóldi.
Jańa aıdardyń taǵy bir keıipkeri – Shymkent qalasyndaǵy «Nur Otan» fraktsııasynyń depýtaty Nargıza Kerimbaeva. 5 balanyń anasy 12 myńnan astam azamatqa qaıyrymdylyq kómek kórsetken jeke eriktiler qozǵalysyn qurdy. Nargıza Kerimbaeva Maqtaaral men Arys qalalaryndaǵy qaıǵyly oqıǵalardan keıin zardap shekken aýdandarǵa arnaıy baryp, turǵyndardy asa qajetti taýarlarmen qamtamasyz etti.

Nargıza Kerimbaeva praımerızde jeńiske jetken soń depýtat atandy. Naq osy partııaishilik irikteýdiń nátıjesinde Shymkent máslıhatyndaǵy «Nur Otan» fraktsııasynyń quramy 75%-ǵa jańaryp, al áıelder sany 12-den 30%-ǵa deıin artty.
Erik-jigeri myqty azamattyń úlgisin kórsetip júrgenderdiń biri – Soltústik Qazaqstan oblystyq máslıhatynyń depýtaty Vladımır Erman. Bala kezinen kıkboksıngpen aınalysqan ol jaraqatyna baılanysty súıikti sportynan bas tartýǵa májbúr boldy. Tipti, sonyń saldarynan júrip-tura almaı qaldy. Alaıda, ór minezdi jigit maqsatynan aınymady, betke alǵan baǵytynan taımady. Jaraqat alǵan soń ol alǵashynda bulshyq etterin nyǵaıtý úshin, sodan keıin kásibı deńgeıde júzýmen aınalysa bastady. Tirek-qımyl apparaty zaqymdanǵan múgedek sportshylar arasynda júzýden halyqaralyq dárejedegi sport sheberi Vladımır Erman búginde ózin tolyǵymen qoǵamdyq jumysqa arnaǵan. Ol erekshe qajettilikteri bar azamattardyń quqyqtary men múddelerin qorǵaýmen burynnan aınalysady. 2014 jyly alǵashqylardyń biri bolyp Petropavlda múgedekter úshin jeńildikpen áleýmettik taksı qyzmetin uıymdastyrý bastamasyn kóterdi. Sonymen qatar, 30-dan astam múmkindigi shekteýli azamatqa turaqty jumys tabýǵa járdemdesti. Nurotandyq belsendi az qamtylǵan otbasylarǵa azyq-túlik sebetterin taratý jáne balalardy mektepke daıyndaý aktsııalaryna únemi qatysady.

Partııanyń taǵy bir jarqyn ókili – Aqtóbe oblystyq máslıhatynyń depýtaty Arman Esenjulov. Zaýytta balqytýshydan «Qazhrom» kompanııasynyń prezıdentine deıingi kásibı joldan ótken ol búginde turaqty túrde qaıyrymdylyqpen aınalysady. Arman Esenjulov metallýrgterdiń kadrlyq rezervin qalyptastyrýǵa jáne jumysshy mamandyqtaryn damytýǵa baǵyttalǵan «Sheberler mektebi» biregeı bilim berý jobasyn qurdy. Búginde elimizdiń taý-ken metallýrgııa salasyn damytýǵa úles qosyp júrgen júzdegen maman osy mektepte bilim aldy. Depýtat jyl saıyn az qamtylǵan jáne kópbalaly otbasylardan shyqqan aýyl mektepteriniń oqýshylaryn Aqtóbege ekskýrsııaǵa alyp barady. Al saıahattyń sońynda balalar planshet, mektep pen sport kıimderin jáne oqý qural-jabdyqtary salynǵan sómkeni syılyqqa alady.
«Balalar úıi túlekteriniń ómiri men mansabyn josparlaý» jobasy aıasynda bıleýshi partııanyń depýtaty Qalqaman balalar úıiniń úsh tárbıelenýshisiniń jáne ata-anasynyń qamqorlyǵynsyz qalǵan eki balanyń jaýapkershiligin óz moınyna aldy. Balalar arnaıy bilim alyp, tegin tamaq pen turatyn jermen qamtyldy. Keıinnen olar zaýytqa jumysqa ornalasty.
2020 jyldyń jazynda «Qazhrom» aýrýhanalardyń reanımatsııa bólimine 6 myńnan astam ottegi ballonyn jetkizý arqyly Aqtóbeniń medıtsınalyq mekemelerine qoldaý kórsetti. Pandemııa kezinde Arman Esenjulovtyń bastamasymen kishi medıtsınalyq qyzmetkerlerge, blokpostardaǵy áskerı qyzmetkerlerge, jalǵyzbasty zeınetkerlerge qaıyrymdylyq kómek kórsetildi.

Partııa taǵy bir mysal retinde «Parasat 2018» qaıyrymdylyq qoryn qurǵan Batys Qazaqstan oblystyq máslıhatynyń depýtaty Nurǵazy Sátbaevty keltirdi. Onyń bastamasymen qor Terekti aýdanynyń «Altyn shýaq» múgedekter birlestigine kómek kórsetip, aýyr naýqasqa ushyraǵan jandardyń shetelde emdelý aqysyn tóleıdi. Sonymen qatar, ol koronavırýspen kúrestiń aımaqtyq qoryna 10 mln teńge aýdardy.
Qaıyrymdy adam retinde Nurǵazy Sátbaev az qamtylǵan jáne kópbalaly tórt otbasynyń turǵyn úı máselesin sheshýge kómektesti. Terekti aýdanynyń Podstepnoe aýylyndaǵy tórt balasy bar ata-anasy sańyraý, tek járdemaqyǵa jan baǵyp otyrǵan otbasyǵa úı alyp berdi. Alty bala tárbıelep otyrǵan taǵy bir kópbalaly otbasy úshin jyl boıy páter kezegi kelgenge deıin jaldamaly turǵyn úı aqysyn tóledi. Sonymen qatar, nurotandyq depýtat Kaztalov aýdany Juldyz aýylynda aýla sypyrýshy bolyp isteıtin jeti balasy bar azamattyń da turǵyn úı máselesin sheshýge járdemdesti. Sondaı-aq, jalǵyzbasty ananyń «Otbasy bank» arqyly páter satyp alý úshin 50% jarnasyn tólep berdi.
Eske sala keteıik, jergilikti ókildi organdarǵa saılaý qorytyndysy boıynsha «Nur Otan» partııasyna saılaýshylardyń 82,4%-y daýys bergen bolatyn. Máslıhattardaǵy bıleýshi partııa fraktsııalarynyń quramy 65%-ǵa jańardy. «Nur Otan» depýtattarynyń ortasha jasy – 45-ti qurap, 6 jylǵa jasardy. Áıelder sany 11-den 30%-ǵa deıin, 35 jasqa deıingi jastar sany 16-dan 23%-ǵa deıin ósti.