«Nur Otan» ókili elordadaǵy keıbir kóshelerdiń jyl saıyn jóndeletinin synǵa aldy

NUR-SULTAN. QazAqparat - «Nur Otan» partııasynyń Nur-Sultan qalalyq fılıaly tóraǵasynyń orynbasary Vladıslav Sergeev elordada keıbir kóshelerdiń jyl saıyn jóndeletindigin synady, dep habarlaıdy QazAqparat tilshisi.

«Jol qurylysy men jóndeý jumystaryna úńile qarap edik. Bir aı ótti, kólik basqarmasynan sońǵy 5 jyldyń ishinde qandaı joldardyń jóndelgeni týraly aqparat ala almaı-aq qoıdyq. Basynda olar 2015-2016 jyldardaǵy aqparattardyń joq ekendigin aıtyp, sońynda áıteýir berdi. Sondaı-aq 2019 jyly júrgiziletin jóndeý jumystaryna qatysty aqparattardyń joq ekendigin aıtty. Sonda bulaı bolǵany qalaı? Qazir mamyr aıy. Al biz áli kúnge deıin qandaı joldardy jóndeıtindigimizdi bilmeımiz be, álde bul qoǵamnan jasyryn aqparat pa ?», - dedi ol Nur-Sultan qalalyq ákimdigi janyndaǵy qoǵamdyq keńes otyrysynda.

Sonymen qatar ol joldardyń qandaı krıterıılermen jóndeletindigi de túsiniksiz ekendigin ashyq aıtty.

«Máselen, Kúıshi Dına kóshesi 2,5 jyl buryn jóndeldi. Sodan keıin basqa basqarma kelip jylý jelileri úshin qazyp tastady. Endi mine, taǵy dál sol kósheni jóndeýge qomaqty qarjy bólip otyrmyz. Qazir Maılın kóshesin jóndemekpiz. Ol kósheni jóndeýdiń qajeti qansha? Jap-jaqsy kóshe. Saraptama qalaı júrgizilip, jóndeletin joldardyń qalaı anyqtalatyndyǵy túsiniksiz. Aqparat múldem joq. Bul maqsatqa qosymsha 205 mln. teńge bólmekpiz. Ol aqsha qaıda ketedi?», - dedi V.Sergeev.

Osy rette keńes otyrysyna qatysqan Nur-Sultan qalalyq kólik jáne jol-kólik ınfraqurylymyn damytý basqarmasynyń ókili jóndeletin joldar aýdan ákimdikterimen aldyn ala kelisiletindigin aıtty.