«Nur Otan» ókilderi praımerız kezinde derekterdi burmalaý áreketiniń jolyn kesti

NUR-SULTAN. QazAqparat – «Nur Otan» partııasynyń partııalyq baqylaý komıteti uıymǵa múshe azamattardyń derekterin Ortalyq esepke alý derekter bazasyndaǵy aqparatpen salystyryp tekserýdi bastady, dep habarlaıdy QazAqparat partııanyń resmı saıtyna silteme jasap.

Atalmysh shara Qazaqstan Respýblıkasynyń Tuńǵysh Prezıdenti – Elbasy, «Nur Otan» partııasynyń Tóraǵasy N.Á. Nazarbaevtyń praımerız ótkizý protsesiniń aıqyndyǵyn qamtamasyz etý jáne barlyq qatysýshyǵa teń jaǵdaı jasaý jónindegi tapsyrmasyn oryndaý maqsatynda qolǵa alynǵan.

Tekseris Nur-Sultan qalasy Almaty aýdandyq fılıalynda jáne Baıqońyr aýdanyndaǵy «Azııa Tsentr Snab» JShS-ndegi bastaýysh uıymynda jappaı burmalaýshylyqtardy anyqtady.

Mysaly, Almaty aýdandyq fılıal 2020 jylǵy 23-24 qyrkúıekte «Nur Otan»-nyń derekter bazasynda 1221 partııalyqtyń mobıldi telefon nómirlerin aýystyrǵan. Engizilgen nómirlerdiń basqa adamdarǵa tıesili ekendigi aıqyndaldy.

Atalǵan bastaýysh uıymda partııa Jarǵysyn jáne partııaǵa múshelikke qabyldaý tártibi týraly nusqaýlyqty buzý faktileri anyqtaldy. Atap aıtqanda, JShS qyzmetkeri dep málimdenip, qyrkúıekte qabyldanǵan BPU-nyń 3 116 múshesiniń basym bóligi basqa uıymdarda, tipti basqa óńirlerde jumys isteıdi. Qońyraý shalý barysynda olardyń kópshiligi ózderiniń partııa múshesi ekenin bilmeıtindikteri belgili boldy, nómirlerdiń kópshiligi basqa nómirge silteıdi, al telefonǵa bir adam jaýap beredi.

«Partııa fılıalynyń basshylyǵy jáne Nur-Sultan qalasy boıynsha Praımerız ótkizý jónindegi uıymdastyrý komıteti Partııalyq baqylaý komıtetiniń usynymyn basshylyqqa ala otyryp, joǵaryda atalǵan faktiler boıynsha kelesi sheshimder qabyldady.

Partııanyń Almaty aýdandyq fılıaly tóraǵasynyń birinshi orynbasary M.Bolysbek praımerız kandıdaty retinde tirkeýden alynyp tastalsyn jáne oǵan qatań sógis jarııalansyn. Sonymen bir mezette qalalyq fılıal qosymsha tekseris júrgizsin jáne derekter bazasyna búkil partııalyqtar boıynsha durys derekter engizsin.

«TOO Azııa Tsentr Snab» BPU taratylyp, jańadan qabyldanǵan 3116 múshe partııadan shyǵarylsyn. BPU basshysy Ý.Alıev pen partııa múshesi D.Perneev praımerızge kandıdat retinde tirkeýden shyǵarylsyn»,-delingen habarlamada.

Praımerız ótkizý boıynsha Ortalyq uıymdastyrý komıteti «Nur Otan» partııasynyń partııaishilik saılaýdyń barlyq qatysýshysy úshin birdeı quqyq berýdi jaqtaıtynyn atap kórsetti. Praımerız jeńimpazdary túbegeıli ádil jáne básekeles daýys berý qorytyndysy boıynsha anyqtalýy tıis. Partııalyqtardy daýys berý quqyǵynan aıyrýǵa eshkimniń de qaqysy joq.

Praımerız ótkizý erejesin qandaı da bir buzýshylyq boıynsha 8 [phone] jedel jelisine (qońyraý shalý tegin) nemese [e-mail] elektrondy pochtasy boıynsha habarlasýǵa bolady. Kelip túsken barlyq aryzdy Partııalyq baqylaý komıteti jan-jaqty qarastyrady. Kinálilerge partııadan shyǵarýǵa deıin barynsha qatań shara qoldanylatyn bolady.