«Nur Otan» ókilderi adasqan balalardy týystaryna taýyp berýge kúsh salýda

NUR-SULTAN. QazAqparat - «Nur Otan» partııasynyń Túrkistan oblysyndaǵy fılıalynyń qyzmetkerleri Arystaǵy oqıǵadan adasqan balalardy týystaryna taýyp berýge jumyldy. Bul týraly Habar» jáne «Qazaqstan» arnasyndaǵy «Arys, biz birgemiz» telemarafonynda partııa ókili Farhat Qýanǵanov málim etti, dep habarlaıdy QazAqparat tilshisi.

«Arys, biz birgemiz» aktsııasy aıaynda Qazaqstan stýdentter alıansy da iske belsendi kirisip ketken. Oqıǵadan habardar bolǵan Túrkistan oblysy men Shymkent qalasynyń 150-ge tarta stýdenti Arystan 300-ge tarta adamdy alyp shyǵyp, qaýipsiz jerge kóshirgen.

Sol sekildi Shymkent qalasynyń Jastar resýrsy ortalyǵy arnaıy jumys tobyn quryp, adasqan balalardy ata-analaryna taýyp berý jumysyn júrgizip jatyr. Bul jumysqa elimizdiń bas partııasynyń músheleri de belsene kirisken.

«Barlyq partııalyq qurylymdar arystyqtarǵa kómektesý úshin birikti. Biz árdaıym partııanyń Túrkistandaǵy fılıalymen baılanys ustap otyrmyz. Bizdiń belsendiler ótkir máselelerdi sheshýge jumyldy. Eń bastysy - balalardyń ata-anasyn, týystaryn taýyp berý. Orta mektep pen meshitterde tizim jasalýda», - dedi Farhat Qýanǵanov.

Eske sala ketsek, Arystaǵy jarylystan zardap shekkenderge kómek qolyn sozý maqsatynda elimizde «Arys, biz birgemiz» aktsııasy bastaldy. Aktsııa aıasynda Mádenıet jáne sport mınıstrligi, Eńbek jáne halyqty áleýmettik qorǵaý mınıstrliginiń qyzmetkerleri bir kúndik jalaqysyn aýdarmaq. Osy bastamaǵa depýtattar da qosylǵan.

Aktsııa aıasynda Túrkistan oblysy Arys qalasyndaǵy oqıǵadan zardap shekkenderge járdem berý úshin Oblys ákimshiliginiń janynan ashylǵan «Túrkistan» korporatıvtik áleýmettik damý qoryna habarlasýyńyzǵa bolady.

«Túrkistan» korporatıvtik áleýmettik damý qory rekvızıtteri

Túrkistan oblysy

Túrkistan qalasy, Kyzylorda tas joly , 34 A ǵımaraty,

Poshta ındeksi 161200

BSN (BIN) 100440016000

«ForteBank» AQ Túrkistan qalasyndaǵy fılıaly

JSK (IIK) KZ7196528F0007014540

BSK (BIK) IRTYKZKA