Nur Otan-nyń tikeleı efırleri barysynda 15 myń suraq qoıyldy
Nur Otan partııasy azamattardyń ótinishterine jedel jaýap berý jáne memlekettiń túrli bastamalaryn belsendi túrde túsindirý maqsatynda áleýmettik jelilerdiń onlaın-platformalaryn belsendi ıgerýde. Bir apta ishinde partııanyń aımaqtyq fılıaldary tóraǵalarynyń birinshi orynbasarlary Facebook jáne Instagram jelilerinde tikeleı efırler uıymdastyryp, halyqtan kelip túsken 15 myńǵa jýyq suraqqa jaýap berdi.
Statıstıkaǵa sáıkes, talqylaýdyń basty taqyryby Elbasynyń bastamasymen qurylǵan «Birgemiz» qorynan beriletin kómektiń ekinshi kezeńi týraly boldy. Sondaı-aq, suraqtardyń kópshiligi memleketten 42 000 teńge tólem alý tártibine, kommýnaldyq qyzmetterdi tóleý úshin beriletin kómekti alý mehanızmderine jáne basqa da áleýmettik qoldaý sharalaryna qatysty boldy.
Máselen, turǵyndarmen onlaın-suhbat barysynda partııanyń Qyzylorda oblystyq fılıaly tóraǵasynyń birinshi orynbasary Aqmaral Álnazarova 200-ge jýyq suraqqa jaýap berdi. Onyń aıtýynsha, aımaqtaǵy 6 myńnan astam otbasy «Birgemiz» qorynan 50 myń teńge kómek alsa, al mamyr aıynda qarajat taǵy 8 myń januıaǵa berilmek. Olardyń ishinde az qamtylǵan jáne kópbalaly otbasylar, birinshi toptaǵy múgedekter, jetimder, UOS ardagerleri jáne taǵy basqalar bar.
Kommýnaldyq tólemder úshin beriletin 15 myń teńge ótemaqyn jaıynda shymkenttikter surady. Atap aıtqanda, qala turǵyndarynyń biri «bul aqshany páterdi jaldaýshylar ala ala ma?» degen suraǵyn joldady. Tikeleı efırde Nur Otan qalalyq fılıaly tóraǵasynyń birinshi orynbasary Bahadyr Narymbetov dereý turǵyn úı departamentiniń basshylyǵymen jáne qalanyń turǵyn úı ınspektsııasymen telefon arqyly baılanys ornatyp, onda olar ókinishke qaraı, jalǵa alýshylar bul ótemaqyny talap ete almaıtyndyǵyn túsindirdi.
Eki saǵatqa sozylǵan tikeleı efır barysynda spıkerge 3 myńǵa jýyq suraq qoıyldy. Sondaı-aq, «Birgemiz» qorynan beriletin tólemder týraly suraq qoıǵandardyń qatary da kóp boldy. Atalǵan tólemdi alýshylardyń sanattaryn túsindire otyryp, Bahadyr Narymbetov shymkenttik 22 myńǵa jýyq otbasyǵa materıaldyq kómek kórsetilgenin, al taǵy 20 myńy jaqyn kúnderi alatynyn atap ótti. Sonymen qatar, tótenshe jaǵdaı kezinde 2 myńnan astam muqtaj otbasyǵa sanıtarlyq qorǵanysh quraldary men azyq-túlik berildi.
Naǵyz rekordty Atyraý oblysynyń nurotandyqtary ornatty. Munda partııa fılıaly tóraǵasynyń birinshi orynbasary Nurlybek Ojaevtyń tikeleı efırin 30 myńǵa jýyq adam kórdi. Ol kómek karantındik sharalardyń zardabyn tartyp otyrǵan otbasylarǵa kórsetilip jatqanyn túsindirdi. Ony alýshylardyń tizimderin áleýmettik jaǵynan osal toptardyń azamattaryn usyna otyryp, ákimdik pen áleýmettik qorǵaý organdary jasady.
Al Túrkistan oblysynda tikeleı efır osymen ekinshi ret ótti. Oblys turǵyndarynyń áleýmettik máselelerge qatysty suraqtarynyń kóptigin eskere otyryp, partııanyń oblystyq fılıaly tóraǵasynyń birinshi orynbasary Beısenbaı Tájibaev onlaın-kezdesýdi ákimdik pen áleýmettik saqtandyrý qorynyń ókilderimen birge ótkizdi. Túrkistandyqtar tótenshe jaǵdaıdyń qashan aıaqtalatynyna, qalaǵa kirip-shyǵýǵa kimderge ruqsat beriletinine qatysty saýaldaryn ortaǵa tastady. Karantın kezinde kórsetilgen áleýmettik kómek úshin partııa músheleri men demeýshilerge alǵystaryn jetkizgen turǵyndar qatary da az bolǵan joq.
Óskemen men Semeıdiń turǵyndary da «Birgemiz» qoryna rızashylyqtaryn bildirdi. Osy eki qaladaǵy 12 myńǵa jýyq otbasyǵa 620 mıllıon teńgeden astam qarjylaı kómek kórsetildi. Taǵy 17 myńy osy aptada qarjylaı kómek alady. Nur Otan partııasy oblystyq fılıaly tóraǵasynyń birinshi orynbasary Oleg Chýgýnkov atap ótkendeı, aqsha ekinshi deńgeıdegi bankter arqyly kartaǵa nemese aǵymdaǵy shottarǵa aýdarylady. Bul rette bank komıssııasy alynbaıdy jáne osy aqshadan nesıe bereshegin óteý úshin ustalmaıdy.
«Birgemiz» qorynan beriletin kómektiń ekinshi kezeńinde Pavlodar oblysynda qarjylaı tólem alýshylardyń sany eki esege artyp, 14 myń otbasyna jetti. Bul týraly partııanyń oblystyq fılıaly tóraǵasynyń birinshi orynbasary Ilıa Terenchenko tikeleı efır barysynda aıtty.
Óz kezeginde partııanyń Soltústik Qazaqstan oblystyq fılıaly tóraǵasynyń birinshi orynbasary Ásem Rahmetova barlyq eriktilerge aıanbaı atqarǵan jumystary úshin alǵys aıtty.
«Ár erikti kúnine 6-7 mekenjaıǵa barady. 2 myńǵa jýyq muqtaj otbasy jeke qorǵanys quraldarymen jáne negizgi qajetti azyq-túliktermen qamtamasyz etildi. Bul jumysty partııa músheleri odan ári jalǵastyrýda. Sonymen qatar, «Birgemiz» qory Petropavldaǵy 4 myńǵa jýyq otbasyǵa 50 myń teńge kóleminde birjolǵy áleýmettik kómek aýdardy, al osy aıda taǵy 8 myń muqtaj otbasy qarjylaı kómek alady», - dedi ol.
Aıta ketý kerek, Nur Otan partııasy endi onlaın-kezdesýlerdi júıeli túrde ótkizýdi josparlap otyr. Bul týraly tıisti habarlandyrýlar partııa fılıaldarynyń áleýmettik jelilerdegi resmı akkaýnttarynda jarııalanady.