«Nur Otan»-nyń saılaýaldy shtaby Shymkentke keldi
Búgin bılik partııasynyń Respýblıkalyq saılaýaldy shtaby Shymkentke keldi. Shahardaǵy medıtsınalyq jáne áleýmettik qyzmetter sapasyn kóterý, jańa turǵyn úıler men áleýmettik nysandar salý, onyń ishinde jańadan qosylǵan aýdandarda qurylys júrgizý máselelerin talqylaý úshin qala turǵyndarymen birneshe kezdesý ótkizdi.
«Nur Otan» partııasy baspasóz qyzmetiniń habarlaýynsha, aldaǵy 5 jylda Shymkent qalasynda 42 mektep pen 22 medıtsınalyq mekemeniń qurylysyn qamtamasyz etý josparlanyp otyr. Qala shetindegi 620 myńnan astam turǵyn taza aýyz sýmen, tabıǵı gazben jáne elektr energııasymen qamtamasyz etiledi. Ásirese, áleýmettik muqtaj azamattarǵa arnalǵan 3 mln sharshy metr turǵyn úı salýǵa basa mán beriledi. Ol úshin 3,5 myń páter salynady.
Sapar barysynda saılaýaldy shtab músheleri qaladaǵy birqatar kásiporyndy aralady. Olardyń qatarynda «AZALA Textile» maqta-mata kombınatyna da bardy.
Jańa jumys oryndaryn ashý, eńbek qaýipsizdigi jaǵdaıyn jaqsartý, óndiristik jaraqat alýdy azaıtý, jumys berýshilerdiń eńbek zańnamasyn buzǵany úshin jaýapkershiligin kúsheıtý jáne taǵy basqa máseleler qarastyryldy.
Shymkent sapary barysynda nurotandyqtar «Jas Otan»-nyń belsendi jastarymen de júzdesip, olarǵa úgit-nasıhat naýqanyna aıanbaı atsalysyp jatqandary úshin alǵys bildirdi.
Sol kúni «Nur Otan» ókilderi Qarataý aýdandyq Halyqqa qyzmet kórsetý ortalyǵynda qala turǵyndarymen ashyq áńgimelesti.