«Nur Otan»-nyń negizgi kúntártibi «Jańa Qazaqstan» baǵdaryn qurýǵa baǵyttalǵan – Qazybek Maıgeldınov
«Nur Otan» partııasynyń negizgi kúntártibi búkil saıası júıe sııaqty «Jańa Qazaqstan» baǵdaryn qurýǵa baǵyttalǵan. Osy turǵyda partııalyq júıe qaıta retke keltiriledi. Ózimiz de kórgendeı, negizinen bul aldaǵy ýaqytta memleket pen qoǵamnyń shynaıy dıalogyn qalyptastyrý úshin Prezıdenttiń qoǵamdyq-saıası quraly bolatyn «Nur Otan» partııasyna qatysty bolmaq. Bul jaıynda Prezıdent naqty ári anyq aıtty. Negizgi basymdyq adamı kapıtalǵa júkteledi. Partııa qatarynda 80 myńǵa jýyq Qazaqstan azamaty bar. Soǵan oraı olardyń áleýetin joqqa shyǵarýǵa bolmaıdy. Olardy ıgilik jolynda qoldaný kerek. Biraq, basty másele partııa quramynyń sapasy boldy. Sondyqtan partııanyń saıası bıýrosyn jańartý is-sharasy qabyldandy. Quram 50 paıyzdan astamǵa jańartyldy. Eń bastysy – azamattyq sektordyń, sonymen qatar áıelder men jastardyń qatysýyn arttyrý. Bul Májilis quramyna da qatysty bolady. Búginde 76 depýtattyń «Nur Otan» partııasynan mandaty bar. Memleket basshysy belgilep bergendeı, partııa fraktsııasy jańarady. Barynsha progresshil, jaýapty ári ashyq depýtattarǵa basymdyq beriledi», - dedi Qazybek Maıgeldınov Memleket basshysy Qasym-Jomart Toqaevtyń keshegi «Habar» agenttigine bergen suhbatyna oraı.
Onyń atap ótýinshe, qańtar oqıǵalary is júzinde júıeli problemalardyń memleket pen qoǵamda, partııada da bolǵanyn kórsetip berdi.
«Osynaý sátte óńirlerde bolyp, sherýshilermen kelissózder júrgizýi tıisti halyq qalaýlylarynyń belsendi jumysyn kóre almadyq. Demek, depýtattar belsendi túrde júrgizýi tıis jumystardyń bári oryn alǵan joq. Kadrlyq rotatsııa jáne partııanyń barlyq basshylyǵyn jańartýǵa qatysty jańa is-sharalar óńirlik deńgeıge de qatysty bolady. Olar partııanyń halyqpen ózara is-qımyl jumysyn jaqsartýǵa shynaı kómektesýi tıis. 200-den astam qoǵamdyq qabyldaýlardyń qyzmetin qaıtadan jandandyryp, halyqtyń senimine qaıtadan ıe bolý qajet», - dedi ol.