«Nur Otan» men Memlekettik qyzmet isteri agenttigi arasynda yntymaqtastyq memorandýmyna qol qoıyldy
Іs-sharaǵa Parlament depýtattary, qoǵam qaıratkerleri, úkimettik emes uıym ókilderi, partııanyń Ortalyq apparatynyń qyzmetkerleri jáne beınekonferentsııa baılanysy arqyly oblys ákimderiniń orynbasarlary men partııanyń óńirlik fılıaldarynyń basshylyǵy qatysty.
Otyrysty ashqan Máýlen Áshimbaev Elbasy, partııa Tóraǵasynyń tapsyrmasy boıynsha «Nur Otan» partııasynyń qoǵamnyń túrli salasynda sybaılas jemqorlyqqa qarsy maqsatty ári júıeli jumys júrgizip kele jatqanyn aıtty.
Bul baǵytta partııanyń Sybaılas jemqorlyqqa qarsy is-qımyldyń 2015-2025 jyldarǵa arnalǵan baǵdarlamasy basty qujat bolyp tabylady. Sondaı-aq partııa Tóraǵasynyń Birinshi orynbasary partııanyń osy máselemen aınalysatyn basty qurylymy retinde Sybaılas jemqorlyqqa qarsy respýblıkalyq qoǵamdyq keńestiń jumys isteıtinin de atap ótti. Mundaı keńester búginde elimizdiń barlyq oblystary men aýdandarynda qurylǵan. Odan bólek, partııanyń Parlament Májilisindegi fraktsııasynyń depýtattary da atalǵan salada aýqymdy jumystar atqarýda. Osy máselelerge toqtalyp ótken partııa Tóraǵasynyń Birinshi orynbasary aldaǵy ýaqytta bul jumystardyń odan ári jandana túsetinin jetkizdi.
«Búgingi memorandým partııa men Agenttik arasyndaǵy sybaılas jemqorlyqqa qarsy is-qımyldyń jańa kezeńine jol ashady dep senemiz. «Nur Otan» partııasy aldaǵy ýaqytta osy salada basqa da memlekettik organdarmen tyǵyz jumys isteýge daıyn. Óıtkeni partııanyń basty mıssııasy - Elbasynyń senimdi tiregi bolýymen qatar Qazaqstandy jańǵyrtýǵa júıeli qatysatyn strategııalyq kúshke aınalý», - dedi Máýlen Áshimbaev.
Sybaılas jemqorlyqpen júıeli kúres júrgizilmese jańǵyrý áreketiniń tıimsiz bolatyny sózsiz. Óıtkeni sybaılas jemqorlyq ekonomıkalyq-saıası júıeni buzyp, bılikke degen senimdi joǵaltady. Sondyqtan ony meılinshe joıyp, aldyn alsa ǵana kózdegen strategııalyq maqsattarǵa qol jetkizýge múmkindik týary anyq. Osyǵan oraı Máýlen Áshimbaev memorandýmda kórsetilgen talap, mindetterdi maqsatty túrde oryndaýǵa partııanyń daıyn ekenin aıtyp, osy baǵyttaǵy birqatar basymdyqtardy atap ótti.
Partııa Tóraǵasynyń Birinshi orynbasary aldymen «Prezıdenttiń bes áleýmettik bastamasynyń» júzege asyrylýyn baqylaý jumystaryna nazar aýdardy. Elbasynyń tapsyrmasyna oraı bes áleýmettik bastamanyń júzege asyrylýyn baqylaý maqsatynda partııanyń bastamasymen Qoǵamdyq keńes qurylǵan bolatyn. Búginde elimiz boıynsha Keńestiń jumysy júıelenip, jedel ári tıimdi áreket etýdi qolǵa aldy. Sonyń nátıjesinde partııa osy baǵyttaǵy jumystarǵa monıtorıng júrgizip, anyqtalǵan olqylyqtardy jan-jaqty qarastyryp, sybaılas jemqorlyqqa qatysty tustaryn Agenttikpen birlesip sheshetin bolady.
Máýlen Áshimbaev bul jumysqa úkimettik emes uıymdardyń da belsene qatysýy kerektigin aıtty.
«Ekinshiden, búginde partııa sybaılas jemqorlyqtyń aldyn alyp, osy saladaǵy kóleńkeli tustardy joıýǵa baǵyttalǵan birqatar partııalyq jobalardy qolǵa aldy.
Úshinshiden, sybaılas jemqorlyqty múldem boldyrmaý úshin memlekettik organdar men ulttyq kompanııalardyń aqparattarǵa qoljetimdiligin qamtamasyz etýge erekshe kóńil bólinbek.
Tórtinshiden, atalǵan teris qubylyspen kúresti kúsheıtý úshin biz partııanyń barlyq resýrsyn jumyldyratyn bolamyz. Partııanyń qoǵamdyq qabyldaýyna kelgen halyq osy máselege qatysty qandaı da bir aqparatpen nemese óz usynystarymen bólisse, ony taldap, talqylap, qajet jaǵdaıda Agenttikke joldaıtyn bolamyz.
Besinshiden, partııa men úkimettik emes uıymdar arasyndaǵy jumysty jandandyrý máselesine tyń serpin beriledi. Aldaǵy ýaqytta osy baǵyttardaǵy jumystardy kúsheıtetin bolamyz», - dedi Máýlen Áshimbaev.
Sonymen qatar jıyn barysynda partııa Tóraǵasynyń Birinshi orynbasary nurotandyqtar arasynda sybaılas jemqorlyqty múldem boldyrmaý úshin aldaǵy ýaqytta partııa músheleriniń sapasyna erekshe mán beriletinin basa aıtty.
«Endi biz partııa músheleriniń sanyna emes sapasyna kóp kóńil bóletin bolamyz. Qandaı da bir sybaılas jemqorlyqqa qatysy bar, qyzmetin óziniń jeke maqsatyna paıdalanǵysy keletin adamǵa partııada oryn joq. Eger biz jemqorlyqpen kúreske belsene qatysqymyz kelse, aldymen óz qatarymyzdyń tazalyǵyn qamtamasyz etip alýymyz kerek. Bul partııanyń ortalyq apparatynan bastap barlyq fılıalyna qatysty. Osylaısha biz partııa ishinde de sybaılas jemqorlyqpen belsendi kúresip, memlekettik organdarǵa úlgi kórsetetin bolamyz», - dedi Máýlen Áshimbaev.
Óz kezeginde Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev sybaılas jemqorlyqpen kúres tek memlekettiń ǵana emes, bul búkil azamattyq qoǵamǵa ortaq másele ekenin aıtty.
«Sondyqtan «Nur Otan» partııasynyń bul salaǵa kóńil bólip, joǵary deńgeıde talqylaýy quptarlyq is», - dedi Alık Shpekbaev.
Onyń sózine qaraǵanda, qazirgi tańda Qazaqstanda jemqorlyqsyz, taza, zamanaýı, quqyqtyq, qoǵam aldynda esep beretin, ashyq ári aıqyn memleket quryldy dep aıtýǵa tolyq negiz bar. Elektrondy Úkimet pen kásibı, strategııalyq memlekettik apparattyń qurylýy da bul saladaǵy baqylaý jumystaryna oń septigin tıgizýde.
«Endigi saty - ınnovatsııalyq memlekettik apparatqa kóshý. Búginde bul baǵytta aýqymdy jumystar atqarylýda», - deıdi Agenttik tóraǵasy.
Osy rette aıta keter jaıt, partııa men Agenttik arasyndaǵy memorandýmnyń basty maqsaty - elimizdiń sybaılas jemqorlyqqa qarsy saıasatyn oryndaýǵa baǵyttalǵan birlesken jáne kelisilgen is-qımyldy daıarlap, júzege asyrý, osy baǵyttaǵy qolǵa alynǵan sharalardyń tıimdiligin arttyrý, jemqorlyqtyń sebep-saldaryn joıý jáne onyń aldyn alý. Soǵan baılanysty birlesken jumystyń birqatar baǵyttary da anyqtaldy.
Atap aıtqanda, memorandým maqsatyna sáıkes taraptar Qazaqstan Respýblıkasynyń sybaılas jemqorlyqqa qarsy strategııasynyń, partııanyń sybaılas jemqorlyqqa qarsy is-qımyl baǵdarlamasynyń jáne «Prezıdenttiń bes áleýmettik bastamasynyń» iske asyrylýyn baqylaý jumystaryna monıtorıng júrgizýdi birlesip atqarmaq.
Sonymen qatar kúsh biriktirý arqyly qoǵamda jemqorlyqqa qarsy mádenıet qalyptastyryp, quqyqtyq saýattylyqty arttyrý, eńbekke adaldyq pen jemqorlyqqa tózimsizdikti keńinen nasıhattaý, sybaılas jemqorlyqqa qarsy tárbıe jáne óskeleń urpaq pen jastardyń bul saladaǵy bilimin tereńdetý sııaqty basym baǵyttar júzege asyrylatyn bolady.
Jıyn barysynda «Nur Otan» partııasy Sybaılas jemqorlyqqa qarsy respýblıkalyq qoǵamdyq keńestiń tóraǵasy, Májilis depýtaty Janat Jarasov, Májilis depýtaty, «Nur Otan» partııasy fraktsııasynyń múshesi Artýr Platonov, Sybaılas jemqorlyqqa qarsy strategııanyń iske asyrylýyn syrtqy taldaý jáne baǵalaý jónindegi respýblıkalyq arnaıy monıtorıngtik toptyń jetekshisi Aıgúl Soloveva jáne taǵy basqa qoǵam belsendileri sóz alyp, atalǵan másele boıynsha óz pikirlerin bildirdi.
Sóz alǵandardyń deni elimizdegi jetekshi saıası kúsh pen memlekettik ókiletti organnyń ózara is-qımyldarynyń jańa deńgeıi Elbasy tapsyrmalarynyń oryndalýyna jan-jaqty baqylaýdy qamtamasyz etýge ǵana emes, sonymen birge azamattardyń sybaılas jemqorlyqqa qarsy quqyqtyq sanasyn qalyptastyryp, memlekettik qyzmetkerler men partııa músheleriniń tártibin kúsheıtýge de mol múmkindik beretinine erekshe nazar aýdardy.