«Nur Otan» qaza bolǵan kenshilerdiń otbasylaryna 1 mln teńgeden bermek

ASTANA. QazAqparat - «Nur Otan» partııasy «ArselorMıttal Temirtaý» AQ kómir departamentiniń «Qazaqstan» shahtasynda metan gazynyń bólinýi saldarynan qaza tapqan úsh kenshiniń otbasyna materıaldyq kómek kórsetti. Marqumdardyń týǵandaryna bir mıllıon teńgeden berildi, dep habarlaıdy QazAqparat Qaraǵandy oblysy ákimdiginiń resmı saıtyna silteme jasap.

«Olar jas boldy. Eń bastysy - olardyń ómirleri áli alda edi. Men qaza bolǵan kenshilerdiń jesir qalǵan jubaılarynyń erjúrektigi men shydamdylyqtaryna tańdanamyn», - dep atap ótken «Nur Otan» partııasynyń Qaraǵandy oblysy boıynsha fılıaly tóraǵasynyń birinshi orynbasary Qadısha Ospanova, materıaldyq kómek partııa Tóraǵasynyń birinshi orynbasary Muqtar Qul-Mýhammedtiń bastamasymen uıymdastyrylǵanyn jetkizdi.

Úsh otbasynda da áke qamqorlyǵynsyz qalǵan kishkentaı balalar bar. Qazir otaǵasyn joǵaltqan áıelderdi jumyspen qamtý máselesi týyndap otyr. Marqum Maksım Shebanovtyń áıeliniń qursaǵynda bes aılyq balasy bar, oǵan  turaqty medıtsınalyq baqylaý qajet. Qadısha Ospanova ony oblystyq perınataldy ortalyqqa ornalastyrýǵa ýáde etti. 

Irına Rýdenko 11 jasar ulyn asyrap otyr jáne de ekinshi balasyna júkti. Oǵan marqum jubaıy jumys istegen shahtada jumys tabyldy. 
Nadejda Ahmetjanovanyń da qolynda úsh balasy jetim qaldy. Kenje qyzy 5 jasta. Nurotandyqtar bul otbasyna da kómek kórsetýge ýáde berdi.

Buǵan deıin habarlaǵanymyzdaı, «ArselorMıttal Temirtaý» AQ kómir departamentiniń «Qazaqstan» shahtasyndaǵy qaıǵyly oqıǵa 31 tamyz kúni boldy. Metan gazynyń kenetten bólinýiniń nátıjesinde úsh kenshi: Rýstam Ahmetjanov, Valerıı Rýdenko jáne Maksım Shebanov qaza boldy. Úsh otbasynda 6 bala ákesiz qaldy. Marqum kenshiler bir ýchaskide jumys istegen, árqaısysynyń kompanııadaǵy jumys ótili 10 jyldan asady. 



Kompanııa basshylyǵy marqumdardyń otbasylaryna ujymdyq kelisimshartta kórsetilgen barlyq mindetterdi oryndaıtynyn jetkizdi.