«Nur Otan» qashanda qoǵamnyń suranysyna jaýap berýge tyrysady - sarapshy

ASTANA. QazAqparat - «Nur Otan» partııasyna jyl saıyn myńdaǵan azamattyń kelip júginýi - partııanyń el ishinde joǵary abyroıǵa ıe ekenin aıǵaqtaıdy. «Nur Otan» partııasynyń 20 jyldyǵyna oraı QR Tuńǵysh Prezıdenti janyndaǵy Áleýmettik ekonomıka jáne saıasat ınstıtýtynyń sarapshysy Kamıla Kovıazına osyndaı pikir bildirdi, dep habarlaıdy QazAqparat tilshisi.

«Partııanyń ishki tártibiniń ereksheligi men evolıýtsııasy negizgi faktormen - Qazaqstandaǵy eń yqpaldy partııanyń tóraǵasy Memleket basshysy Nursultan Nazarbaevpen aıqyndalady. Onyń jyl saıyn halyqqa Joldaýynda aıtylatyn bastamalar partııanyń jumys josparynda kórinis berip otyr. Máselen, partııa men onyń jastar qanaty saty-saty saıyn ulttyq qaýipsizdikti saqtaýǵa basymdyq bere otyryp, bilim, ǵylymı áleýetti damytý sekildi adam kapıtalyn arttyrýǵa qadam basady», - deıdi sarapshy.

Kamıla Kovıazınanyń aıtýyna qaraǵanda, «Nur Otan» partııasy árdaıym qoǵamnyń suranysyna ýaqtyly jaýap berýge tyrysady.

«Máselen, 2016 jyly saılaýaldy baǵdarlama daǵdarysty eńserý sekildi mańyzdy mindetterdi esepke alsa, qazirgi tańda partııa basty nazardy otbasy saıasatyna, kópbalaly analardyń jaǵdaıyna aýdaryp otyr», - deıdi Kamıla Kovıazına.

Sarapshynyń sózine qulaq assaq, partııa óz jumysyn belgili bir aýdıtorııaǵa ǵana emes, barlyq taraptyń múddesin eskere otyryp júrgizedi.

«Osy baǵyt «Nur Otandy» saıası partııa ǵana emes, jetekshi memlekettik organdardyń biri retinde kórsetedi. Kóp jaǵdaıda bul partııa memlekettik organdardyń qyzmetin ózi alyp kele jatqanyn aıta ketý kerek. Sebebi, óz máselesin sheshý úshin qanshama halyq partııaǵa júginip jatady. Osy faktor partııanyń el ishinde bedel-abyroıy joǵary ekenin aıǵaqtaıdy», - dep túıdi sarapshy.