«Nur Otan» halyqpen syndarly dıalog qurýdyń joldaryn usyndy

TÚRKІSTAN. QazAqparat – Túrkistan oblysynyń sheneýnikteri halyqtyń ótinish-shaǵymdaryn tyńdaý úshin bazar, saıabaq, úılerdiń aýlasynda galstýksyz qabyldaýlar ótkizetin bolady. Bul týraly QR Prezıdenti Qasym-Jomart Toqaevtyń Qazaqstan halqyna arnaǵan Joldaýyna baılanysty aktıv otyrysynda aıtyldy, dep habarlaıdy QazAqparat.

Oblys ákimi Ómirzaq Shókeev QR Prezıdentiniń Joldaýynda aıqyndalǵan baǵyttar elimizdiń ekonomıkalyq ósimin jedeldetip, halyqtyń ál-aýqatyn jaqsartýda mańyzdy ról atqaratynyna toqtaldy.

Óńir basshysynan keıin sóz alǵan «Nur Otan» partııasy Túrkistan oblystyq fılıaly tóraǵasynyń birinshi orynbasary Beısen Tájibaev jergilikti atqarýshy organdardaǵy partııa múshelerine máseleni jasyrǵannan góri jedel sheshken tıimdi ekenin atap ótti.

«Búginde oblysta áleýmettik jaǵdaıdyń tómendigi, turǵyn úı jáne jumysqa ornalasý máseleleri óte ózekti. Partııa fılıaly birinshi kezekte osy baǵyttaǵy problemalardy júıeli túrde sheshý úshin jergilikti ákimdiktermen, tıisti basqarmalarmen jospar túzip, júrgizetin bolady. Prezıdenttiń Joldaýda aıtqan barlyq eldiń ótinish-tilekterin tıimdi qarastyratyn «Halyq únine qulaq asatyn memleket» tujyrymdamasyn iske asyrý úshin eki baǵytta jumys júrgizemiz», - dedi ol.

Atap óteıik, Joldaýda atap ótilgen - halyqtyń ótinish-tilekterin tıimdi qarastyratyn tujyrymdamany iske asyrý Túrkistan oblysynda eki baǵytta júrgizilmek. Eń aldymen, partııa fılıalynyń Qoǵamdyq qabyldaý keńsesi Túrkistan qalasyndaǵy halyq eń jıi shoǵyrlanǵan Almaty arbatyndaǵy ǵımaratta «Open space» formatyna kóshedi. Ekinshiden, barlyq laýazym ıeleriniń qabyldaýlaryn áleýmettik jelilerde tikeleı efır arqyly júrgizý qolǵa alynbaq.

Sonymen qatar, aktıv jınalysynda partııa fılıaly Joldaýdy halyqqa tıimdi etip nasıhattaý úshin eski formattaǵy kóptegen jınalystardy toqtatyp, eldegi sheshimin tappaǵan máselelerge jaýapty ókilderdi alyp, eldiń ortasyna shyǵýdy usyndy. Atap aıtqanda, kásiporyn aýlasynda, bazarlarda, alańdarda, saıabaqtarda, egistik alqaptarynda, fermalarda ashyq aspan aıasynda galstýksyz kezdesýler ótkizý qajet. Al turǵyndar sala mamandaryna tikeleı saýal qoıyp, jaýabyn alý kerek.

Jalpy, jyl basynan beri «Nur Otan» partııasy Túrkistan oblystyq fılıalynyń Qoǵamdyq qabyldaý bólmesine 5204 aryz-shaǵym túsken. Onyń 2747-si ońtaıly sheshilip, 2289 ótinishke zań aıasynda keńester berildi. 168 ótinish búginde qaralý ústinde.

Halyqtan túsken 5204 aryz-shaǵymdy taldaı kele, oblys turǵyndaryn tómendegideı máselelerdiń 2148 – áleýmettik kómekke muqtajdyq boıynsha; 1629– turǵyn úıge jáne jerge muqtajdyq boıynsha; 454– jumysqa ornalasý, zańsyz jumystan shyǵarý, eńbek aqy óndirý máselesi. Shaǵymdardy aımaqtarǵa bólgende Keles, Ordabasy, Jetisaı aýdandary kósh bastap tur.