Nur Otan Densaýlyq saqtaý jáne Eńbek vıtse-mınıstrlerine shara qoldanýdy talap etti
Qazaqstanda koronavırýstyq ınfektsııadan 186 medıtsına qyzmetkeri qaıtys boldy. Alaıda qaza tapqandardyń tek 9-ynyń otbasyna ǵana ótemaqy tólengen. Mundaı kóńil júdetetin statıstıka búgin «Nur Otan» Partııalyq baqylaý komıtetiniń otyrysynda jarııa etildi. Partııalyqtar COVID-ben kúres boıynsha epıdemııaǵa qarsy is-sharalarǵa tartylǵan dárigerlerge aı saıynǵy jalaqyǵa qosymsha ústemeaqy tóleý, sondaı-aq osy indetti juqtyrǵan nemese sodan qaıtys bolǵan jaǵdaıda medıtsına qyzmetkerlerine ótemaqy tóleý máselelerin qarady.
Sonymen, Partııalyq baqylaý komıtetiniń tóraǵasy Pavel Kazantsev áleýmettik medıtsınalyq saqtandyrý qorynan búginge deıin ınfektsııa juqtyrǵan 1093 dáriger ǵana 2 mln. teńgeden ótemaqy alǵanyna toqtaldy. Al sol kezde, naýqastanǵan medıtsına qyzmetkerleriniń jalpy sany 11293 adamdy qurady.
«El prezıdenti Qasym-Jomart Kemeluly Toqaev óziniń Qazaqstan halqyna Joldaýynda pandemııa týyndatqan daǵdarys bizdi kóp nársege úıretkenin atap ótti. Máselen, dárigerdiń eńbegin baǵalaı bilý, onyń mańyzdylyǵyn kúsheıtý úshin materıaldyq turǵydan qoldaý kerek. Qazaqstan Respýblıkasynyń Eńbek jáne halyqty áleýmettik qorǵaý mınıstri men Densaýlyq saqtaý mınıstriniń birlesken buıryǵy 9 sáýirde qabyldanyp qoıǵanyna qaramastan, ótemaqy tóleý jónindegi óńirlik komıssııalardyń alǵashqy otyrystary tek tamyz aıynda ótti. Medıtsına qyzmetkerleriniń indet juqtyrýynyń alǵashqy jaǵdaılary naýryz aıynda oryn alǵan bolsa, bul máseleni osynsha sozbalańǵa salýdyń sebebi nede?! Aımaqtyq partııalyq baqylaý komıssııalary bıýrokratııa men sózbuıdaǵa salý faktilerin qarap, kináli partııa múshelerin eń qatań jaýapkershilik sharalaryna tartýy kerek», - dedi Pavel Kazantsev.
Densaýlyq saqtaý vıtse-mınıstri Lıýdmıla Bıýrabekovanyń aıtýynsha, qazirgi ýaqytta ınfektsııa juqtyrýshylardy 3 topqa bólgen. Osy maqsatqa respýblıkalyq bıýdjetten 3 aı merzimge qarajat qaralypty. Ústemeaqy naqty jumys istegen kezeń úshin aı saıyn esepteledi.
Óz kezeginde QR Eńbek jáne halyqty áleýmettik qorǵaý vıtse-mınıstri Erbol Ospanov ústemaqy tóleýden bas tartýdyń negizgi sebepteri retinde indetti qaıdan juqtyrǵanyn kórsetpeý nemese ony juqtyrýdyń jumys barysynda oryn almaýy, derekterdi qate kórsetý jáne basqalardy atady.
«Ulttyq ǵylymı medıtsınalyq ortalyq» AQ basqarma tóraǵasy, belgili pýlmanolog Abaı Baıgenjın de qosymsha tólemderge qatysty mańyzdy másele kóterdi. Ol UǴMO-tyń 2 aı boıy juqpaly aýrýlar klınıkasy retinde jumys istegenin, naýqastar táýlik boıy qabyldanǵanyn, al qosymsha jumys úshin Densaýlyq saqtaý mınıstrliginen ústemeaqy túspegenin aıtty.
«Tájirıbemizdi eskerip, bizge eń aýyr naýqastar jetkizildi. Bizdiń dárigerler, medbıkeler, sanıtarlar, táýlik boıy jumys istedi, óıtkeni naýqastardy emdeý kerek. Jumys stavkasy týraly oılaǵan da joqpyz. Ulttyq ortalyq bolǵandyqtan, bizde qarjylyq resýrstar bar, men shyǵyndardy ortalyq esebinen japtym. Al bul aqshany qaıtarý úshin Densaýlyq saqtaý mınıstrligine júgingengenimizde, bizge bul sizderdiń shyǵyndaryńyz, biz ony qaıtarmaımyz dedi. Óńirlerdegi áriptesterimniń jaǵdaıy qanshalyqty qıyn bolǵanyn jaqsy túsinemin. Olardyń jaǵdaıy bizden on ese aýyr. Ústemaqy tóleý sonshalyqty qıyn ba?»,- dedi Abaı Baıgenjın.
PBK múshesi, Májilis depýtaty Murat Temirjanov aımaqtarda oryn alǵan aýyr jaǵdaılardyń bir kórinisi retinde Kókshetaý qalasyndaǵy medıtsınalyq mekemeni mysalǵa keltirdi. Mundaǵy medıtsına qyzmetkerleriniń jumys kúniniń basynda jáne jumystan soń IFA (qannyń ımmýnofermenttik taldaýy) ádisimen qajetti testileýden ótýge múmkindikteri bolmaǵan.
«Kókshetaý aýrýhanasynadaǵy kezekshilik aýysymnyń qalaı júzege asatynyn óz kózimmen kórdim. Adamdar avtobýsqa otyrdy da, úıdi-úıine ketip qaldy. Oblystyq densaýlyq saqtaý basqarmasynan nege olardyń aldymen testileýden ótpeıtinin suradym. Sóıtsek, Kókshetaýdaǵy jeke menshik zerthanalarda da, memlekettik zerthanalarda da IFA ádisimen tekserý júrgizilmeıtin bolyp shyqty. Shyn máninde, osy 4-5 aı boıy olar bas sanıtarlyq dárigerdiń qaýlysyn buzdy. Sonda sizder (Densaýlyq saqtaý mınıstrligine qaratyp aıtyp otyr) olardyń qaısysy jumysqa basqa jerden aýrý juqtyryp kelgenin, qaısysy kezekshilik aýysymyn atqarý barysynda juqtyryp alǵanyn qalaı anyqtadyńyzdar? Іndetti kimniń qaı jerden juqtyrǵanyn qalaı anyqtaýǵa bolady?»,- dedi Murat Temirjanov.
Partııalyqtar QR DSM janyndaǵy «Respýblıkalyq elektrondyq densaýlyq saqtaý ortalyǵy» ShJQ RMK qyzmetine jeke toqtaldy. Partbaqylaý komıtetiniń málimeti boıynsha, «Mapcovid» júıesin Eńbek mınıstrliginiń Aqparattyq júıesimen ıntegratsııalaný protsesine baılanysty qatelikter oryn alyp otyr. Júıe statsıonarda emdelmegen, biraq ambýlatorııalyq em qabyldaǵan medıtsına qyzmetkerleriniń qujattaryn qabyldamaıdy (júıe «Dıagnoz tabylmady» degen qate tabady).
«Bul nege burynyraq jasalyp qoımaǵan? Tehnıkalyq turǵydan bul sonshalyqty qıyn ba álde ony sheshý endi ǵana qolǵa alynyp jatyr ma? Qarapaıym nárse ǵoı. Excel-degi birneshe kesteni bir jerge jınaý kez kelgen stýdenttiń de qolynan keledi! Al munda osyny bútindeı bir ShJQ RMK atqara almaı otyr. Bul ne sonda qasarysý ma álde beıqamdyq pa?», - dedi Pavel Kazantsev.
Otyrys sońynda partııalyq baqylaý komıteti densaýlyq saqtaý vıtse-mınıstri Lıýdmıla Bıýrabekovany jáne eńbek vıtse-mınıstri Erbol Ospanovty sógis túrindegi partııalyq jaýapkershilikke tartýdy usyndy.
Eńbek mınıstrligi men Densaýlyq saqtaý mınıstrliginiń ókilderi bolsa, ótemaqy tóleý máselesi osy jyldyń 14 qyrkúıegine deıin sheshiletinine sendirdi.