Nur Otan azyq-túligi jetispeıtin gýmanıtarlyq paketter týraly aıtty
Rıtol F-B esimdi Facebook qoldanýshysy balalary tegin azyq-túlik paketin alǵanyn jazǵan. Biraq aıtýynsha, onda keıbir zattar jetispeıdi. Sebebi ózi týra sondaı gýmanıtarlyq kómek paketterin jınaýǵa qatysyp, volonter bolǵan.
«Búgin balalarym azyq-túlik sebetin aldy. Biz jınaıtyn jınaqtan balalarǵa qant qosylǵan súttiń 1 bankasy, buqtyrylǵan ettiń 1 bankasy, 1 quty suıyq maı, Nur Otan partııasynan gıgıenalyq zattar, sabyn, antıseptık jetispedi», - dedi ol.
«Nur Otan» partııasy Almaty bólimshesi tóraǵasynyń orynbasary Stanıslav Kankýrov shaǵym túsirgen bul adam volonter bolyp az ýaqyt jumys istegenin aıtady. Keıin ol muqtaj adamdar qataryna jatqan soń osyndaı sebet alǵan.
«Azyq-túlik sebeti birneshe jerden jınaqtalady. Ol jerde bıýdjet qarajaty joq. Azyq-túlik jaǵyn qor toltyrady. Bul sebet qalalyq Áleýmettik ál-aýqat qory basqarmasymen kelisiledi», - dedi ol.
Stanıslav Kankýrov budan bólek basqa demeýshilerden keletin sebetter de bar ekendigin aıtty.
«Taǵy bir qor bizge 1000 sebet bóldi. Bul sebetter jınaqtalyp daıyn turǵandyqtan olar ashylmady. Adamdar shyn júrekten kómektesý úshin berip jatyr. Daıyn zatty ákelgen soń volonterler taratady. Múmkin keı taýarlar bolmaǵan shyǵar. Keıbiri arzan bolýy múmkin. Al bizdiń qordan ketetin sebetter qatań baqylaýdan ótedi. Buǵan deıin bizge shaǵym túsken emes. Eger bir adamnan shaǵym tússe biz ony partııa baqylaýyna alyp, tekseretin bolamyz», - dedi ol.